काठमाडौं, साउन ३-सत्तारूढ नेपाल कम्युनिस्ट पार्टी (नेकपा) सचिवालय बैठक बालुवाटारमा सुरु भएको छ । पार्टीभित्र देखिएको विवाद समाधानको प्रयासस्वरूप स्थायी कमिटी बैठक स्थगित गरेर सहमतिको प्रयासका लागि सचिवालय बैठक बस्न लागेको हो । पार्टी केन्द्रीय सचिवालयकाे बैठक ३:१० बजेदेखि बालुवाटारमा जारी रहेको प्रधानमन्त्री केपी शर्मा ओलीका प्रेस सल्लाहकार सूर्य थापाले जानकारी दिए ।

असार १० गतेदेखि सुरु भएको स्थायी कमिटी बैठक पटक–पटक स्थगित हुँदै आएको छ । शुक्रबार एकैदिन २ पटक स्थायी कमिटी बैठक स्थगित गरे सचिवालयको बैठक बोलाउने निर्णय नेकपाले गरेको थियो ।

बैठकअघि प्रधानमन्त्री एवं अध्यक्ष ओली र अर्का अध्यक्ष पुष्पकमल दाहाल (प्रचण्ड) छलफल गरेका थिए । ‌नेकपाभित्र प्रधानमन्त्री र अध्यक्ष दुवै पदबाट ओलीलाई राजीनामा दिन शीर्ष नेताहरूले दबाब दिँदै आएका छन् भने ओलीले आफूले दुवै पद नछाड्ने अडान राखेका छन् ।