काठमाडौं, ७ जेठ-लिम्पियाधुरा, कालापानी र लिपुलेक क्षेत्रलाई समेटेर नेपालले नयाँ नक्सा सार्वजनिक गरेपछि भारतले प्रतिक्रिया जनाएको छ । आज नेपालले आधिकारीकरूपमा नक्सा जारी गरेसँगै भारतले औपचारिक प्रतिक्रिया जनाएको हो ।  भारतीय विदेश मन्त्रालयका प्रवक्ता अनुराग श्रीवास्तवले पत्रकार सम्मेलमा नेपालको नयाँ नक्साले भारतको भूमि समेटेको आरोप लगाए ।

‘नेपाल सरकारले भारतीय भूमि समेटेर नयाँ नक्सा जारी गरेको छ’ श्रीवास्तवले भने, ‘एकपक्षीय रुपमा गरिएको यो कदम ऐतिहासिक तथ्य र प्रमाणमा आधारित छैन ।’

श्रीवास्तवलेले यो नेपाल र भारतबीच विवादित सीमा क्षेत्रलाई द्विपक्षीय समझदारीका आधारमा टेकेर कुटनीतिक तवरले हल गर्ने कुराविरुद्ध रहेकोसमेत बताए ।

भारतले सीमा क्षेत्रका बारेमा भारतको अडान नेपाललाई राम्ररी थाहा भएका बताउँदै भारतीय सार्वभौमसत्ता र अखण्डतामाथि अन्यायपूर्वक हस्तक्षेप गर्ने कुरा सुधार गर्ने आशा लिएको समेत उनले बताए ।

‘नेपाली नेतृत्वले सीमा समस्यालाई कुटनीतिक संवादका माध्यमले हल गर्ने दिशामा सकारात्मक वातावरण बनाउने आशा गर्दछौँ ।’ श्रीवास्तवले भने । नेपालले लिम्पियाधुरा नेपालको भएको र कालापानीमा भारतीय सेनाको अनाधिकृत हस्तक्षेप भएकोमा निरन्तर विरोध गर्दै आएको छ ।