बुटवल, ५ जेठ-प्रदेश-५ का पहाडी जिल्लामध्ये गुल्मी जिल्लामा पहिलोपटक कोरोना संक्रमण पुष्टि भएको छ । स्वास्थ्य मन्त्रालयले सवा ४ गरेको पत्रकार सम्मेलनमा गुल्मीका १ जनामा कोरोना संक्रमण पुष्टि भएको स्वास्थ्य मन्त्रालयका प्रवक्ता डा. विकास देवकोटाले जानाकारी दिए।

संक्रमित पुरुष ४१ वर्षका हुन् । उनी गुल्मीको मदाने गाउँपालिका-६ पुर्कोट दहका रहेको गाउँपालिकाका अध्यक्ष दानबहादुर केसीले पुष्टि गरे । संक्रमित पुरुष गाउँमै थिए । उनलाई निमोनिया भएको भन्दै बुटवलको १ अस्पतालमा उपचारको लागि ल्याइएको थियो ।

उपचारमा ल्याउने क्रममै उनको पीसीआर परीक्षण गरिएको थियो । भैरहवा गहुबाली अनुसन्धान केन्द्रमा रहेको प्रदेश जनस्वास्थ्य प्रयोगशालामा गरिएको परिक्षणमा उनलाई कोरोना पुष्टि भएको हो । उनी गाउँमै बस्दै आएका थिए । संक्रमण कसरी भयो भन्ने केही भन्न नसकिने गाउपालिका अध्यक्ष के.सीले बताए ।

‘उहाँ बाहिर कहि पनि जानु भएको थिएन । कसरी कोरोना भयो थाहा छैन’ उनले भने– ‘उहाँको सम्पर्कमा आउनु भएकाहरूको खोजी भइरहेको छ ।’ हाल संक्रमित बुटवलको १ अस्पतालमा उपचारत रहेको बताइएको छ ।