विराटनगर,जेठ ३–मोरङको सुन्दरहरैचा नगरपालिका– १० विराटचौक स्थित गोर्खा डिपार्टमेन्ट स्टोरमा बेच्न राखिएको च्याउमा किरा भेटिएको छ । घरेलु तथा साना उद्योग कार्यालय विराटनगरको नेतृत्वमा आएको अनुगमन टोलीले डिपार्टमेन्ट स्टोरमा बेच्न राखिएको ६८ थान प्याकेजिङ्ग गरिएको च्याउमा किरा भेटिएको हो ।

थाइलेण्डबाट आयत गरेर ल्याएको भनिएको उक्त च्याउमा ढुसी परेर किरा लागेको अवस्थामा फेला पारेको घरेलु तथा साना उद्योग कार्यालय विराटनगरका प्रमुख उद्योग अधिकृत गोकुल केसीले जानकारी दिए ।

किरा भेटियो च्याउमा उत्पादन मिती र म्याद सकिने मिती पनि उल्लेख थिएन् । संयुक्त बजार अनुगमन टोलीले किरा भेटिएको च्याउ पूर्ण रुपमा नष्ट गरेको छ । अनुगमनको क्रममा गोर्खा डिपाटमेन्ट स्टोरले खाद्यान्य लगायतको सामान पनि उद्योगमा दर्ता नगरी आफनै पसलको नाममा प्याकेजिङ्ग गरि विक्री वितरण गरिएको पाइएको उद्योग अधिकृत केसीले बताए ।

डिपार्टमेन्ट स्टोरले खाद्य प्रविधि तथा गुण नियन्त्रण कार्यालयबाट अनुज्ञा पत्र पनि नलिकन खाद्यान्य विक्री वितरण गरिएको पाइएपछि संयुक्त बजार अनुगमन टोलीले ५० हजार रुपैयाँ जरिवना गरिएको उनले बताए । उनले आगामी दिनमा म्याद सकिएको खाद्य बस्तु विक्री वितरण नर्गन र प्याकेजिङ्ग उद्योगमा दर्ता गराइ खाद्य अनुज्ञापत्र लिएर मात्र विक्री वितरण गर्न कडा निर्देशन दिएको केसीले बताए ।

यस्तै सोही दिन गरिएको अनुगमनको क्रममा सुन्दर हरैचा नगरपालिकास्थित जुनतारा बजारमा सुप र विभिन्न मसलामा म्यात सकिएको भेटिएको छ । पहिलो पटक थोरै परिणाममा म्यात सकिएको सामन भेटिएकोले न्यूनतम १० हजार रुपैयाँ जरिवना गरिएको बताइएको छ ।

यस्तै सगुन किराना स्टोरमा पनि अनुगमन गरिएको छ । उक्त स्टोरलाई उपभोक्ता हित संरक्षण ऐनको पूर्ण पालना गरि विक्री वितरण गर्न निर्देशन दिएको बताइएको छ । अनुगमनका क्रममा अखाद्य वस्तु विक्री वितरण गरिने फर्मलाई कारबाहीको दायरामा ल्याउने सुन्दरहरैचा नगरपालिकाकी उपप्रमुख धनमाया तामाङले बताइन् । यता गार्खा डिपार्टमेन्ट स्टोर विराटचौकका इन्चार्ज सन्तोष आचार्यले भने च्याउमा घुन मात्र लागेको दाबी गरे ।