एजेन्सी, बैशाख २५-भारतको आन्ध्र प्रदेशको विशाखापटनममा रहेको एक रासायनिक प्लान्टबाट ग्यास लिक हुँदा ८ जनाको मृत्यु भएको छ भने सयौँ बिरामी भएका छन् ।

रासायनिक प्लान्टबाट ग्यास लिक भएपछि सो क्षेत्रमा भागदौड मच्चिएको छ । जिल्ला अधिकारी विनय चन्दले २ सयभन्दा बढी मानिस बिरामी भएको जानकारी दिए ।

मानिसहरू सुतिरहेको समयमा गएराति ग्यास चुहिएको थियो । बिरामी सबैलाई उपचारका लागि अस्पताल पठाइएको छ । अस्पताल लगिएका मध्ये ८६ जनालाई भेन्टिलेटरमा राखिएको छ ।

३ जनाको मृत्यु ग्यास प्लान्टनजिकै र ५ जनाको किङ जर्ज अस्पतालमा उपचारका क्रममा मृत्यु भएको हो । अहिलेसम्म ग्यास चुहिनुको कारण पत्ता लागेको छैन । प्लान्टको व्यवस्थापनविरुद्ध एफआईआर दर्ता गरिएको छ ।