काठमाडौं, २४ वैशाख-सत्तारूढ दल नेपाल कम्युनिष्ट पार्टी (नेकपा)को सचिवलायका सदस्यहरू प्रधानमन्त्री एवं अध्यक्ष केपी शर्मा ओलीलाई कुरेर बसेका छन् । बैठककै बीच बाहिरिएका ओलीको प्रतीक्षामा अर्का अध्यक्ष पुष्पकमल दाहाल प्रचण्डलगायतका सदस्यहरू सरकारी निवास बालुवाटार बसेका छन् ।

बैठककै क्रममा चर्काचर्की भएपछि प्रधानमन्त्री ओली बैठकबाट बाहिरिएका थिए । बैठकमा नेताहरूबीच चर्काचर्की हुन थालेपछि प्रधानमन्त्री ओलीले म थाकेँ भन्दै शयनकक्षतर्फ लागेको बालुवाटार स्रोतले बतायो । ‘प्रधानमन्त्री आराम गर्न जानु भएको हो । बैकमा पुनः सहमागि हुनुहुन्छ’ प्रधानमन्त्री ओली निकटका एक नेताले भने ।

प्रधानमन्त्री ओली एक पद एक मुख्य जिम्मेवारीको विपक्षमा रहेका छन् । तर, बहुमत सचिवालय सदस्यहरू त्यसको कार्यान्वयन गर्ने पक्षमा छन् । प्रक्रिया पूरा नगरी राजनीतिक दल र संवैधानिक परिषद्सम्बन्धी २ अध्यादेश ल्याएपछि पार्टीभित्रै ओली घेराउमा परका छन् । विवादका कारण नेकपाले २५ वैशाखमा स्थायी कमिटीको बैठक बोलाएको छ । स्थायी कमिटी बैठकका एजेण्डा के के हुने भनेर आज सचिवालयले निर्णय गर्ने बताइ तापनि विवाद झन बढेको छ ।

नेकपाको सचिवालय बैठक २० वैशाखमा पनि बसेको थियो । उक्त बैठकमा विवाद मिलेको बताए पनि दुई दिनपछि पुनः विवाद सुरु भएको छ । विवादका बीच आज पुन: सचिवालय बैठक बसेको छ । नेकपाको ९ जनाको सचिवालयमा २० गतेको बैठकमा ओली बहुमतमा थिए भने प्रचण्ड नेपाल समूह अल्पमतमा ।