जनकपुर, १९ वैशाख-धार्मिक एवं पर्यटकीय नगरी जनकपुरधाममा जानकी जन्मोत्सव आज मनाइँदै छ । त्रेता युगमा वैशाख शुक्ल नवमीका दिन देवी जानकीको जन्म भएकाले जनकपुरधाममा जानकी जन्मोत्सव प्रत्येक वर्ष विशेष उत्सवका साथ मनाइने गरिन्छ । जन्मोत्सवका लागि जानकी मन्दिरलाई विशेष रूपले सजाइएको छ । लकडाउनका कारण आम श्रद्धालुलाई मन्दिरभित्र प्रवेश गर्न दिइएको छैन ।

‘यसपाली कसैलाई मन्दिर आउन हामीले भनेका छैनौँ घरबाट उत्सव मनाउन आग्रह गरेका छौँ,’ जानकी मन्दिरका उत्तराधिकारी महन्थ रामरोशन दास वैष्णवले भने, ‘पहिला आफ्नो जीवन बचाउनु पर्छ ।’

सीताको जन्मोत्सव वैशाख शुक्ल नवमी तिथिका दिन परे पनि मिथिलाञ्चलमा एक महिना पहिलादेखि नै यसको धुम रहेको छ । घर–घरमा सोहर (बच्चा जन्मको बेला मिथिलाञ्चलमा गाइने गीत) गाउने कार्य चैत देखि नै सुरु भएको हो । रातिमा घण्टौँ यस्ता गीतहरू महिला आ-आफ्ना घरमा गाउने गरिन्छ ।

जनकपुरधामको प्रसिद्ध जानकी मन्दिरमा लकडाउनका बाबजूद पूरै उत्सवको महौल बनेको छ’ महन्थ राम तपेश्वर दास वैष्णव भन्छन्, ‘देवी सीताको जन्मोत्सवमा सरिक हुनेको छुट्टै महत्व रहेको छ त्यस कारण यो क्षणलाई कसैले छोड्न चाहँदैनन् । जनकपुरमा त यहाँ सम्म भनिन्छ कि जानकी नवमी, विवाह पञ्चमी, राम नवमी र झुलामा भगवान राम सीता वैकुण्ठबाट मिथिलामा आई हाल्नुहुन्छ । यसपाली कसैलाई मन्दिर आउन हामीले भनेका छैनौँ ।’