काठमाडौं, १५ वैशाख-नेपाल प्रहरीले पूर्वप्रधानमन्त्री तथा जनता समाजवादी पार्टी (जसपा) का नेता डा. बाबुराम भट्टराईविरुद्धको साइबर अपराधसम्बन्धी जाहेरी दर्ता गर्न अस्वीकार गरिदिएको छ ।

नेपाल कम्युनिस्ट पार्टी (नेकपा) को भ्रातृ संस्थाका युवा विद्यार्थी नेताहरूलाई डा. भट्टराईलगायत नेताविरुद्ध जाहेरी दर्ता गर्न गए पनि प्रहरीले जाहेरी दर्ता नगरी फर्काइदिएको छ ।

विद्यार्थी नेताहरूले डा.बाबुराम भट्टराई, हिसिला यमी, विश्वदीप पाण्डे र आङकाजी शेर्पाले विद्युतीय माध्यमबाट आफ्ना नेताहरूको चरित्र हत्या गरेको भन्दै युवासंघ र अनेरास्ववियूका नेताहरू साइबर अपराधमा कारबाही गरिपाऊँ भनी जाहेरी दिन महानगरीय प्रहरी परिसर टेकुमा पुगेका थिए ।

प्रहरीले सो विषयमा गाली बेइज्जतीसम्बन्धी ऐन आकर्षित हुने भन्दै त्यत्तिकै टारेर उनीहरूलाई सरकारी वकिलमार्फत अदालतमा जान सल्लाह दिएको बताइएको छ ।

युवा संघका केन्द्रीय सदस्य सञ्जीवकुमार झा र अनेरास्ववियुका नारायण घर्ती साइबर अपराधमा जाहेरी दिन टेकुमा पुगेका थिए । जाहेरी दिन जाने टोलीमा उनीहरूसँगै अनेरास्ववियूका संयोजक ऐन महर, युवासंघका सहसंयोजक रमेश पौडेल, किरण पौडेललगायतका नेताहरूसमेत थिए ।