सरकारी वकिलको कार्यालयमा प्रहरीले आज अनुसन्धान प्रतिवेदन बुझाए पनि मुद्दा दायर भने भएको छैन ।जगदम्बा स्टिल्स र सिमेन्टका सञ्चालकसमेत रहेका अग्रवाल कालो बजारी गरेको आरोपमा २५ चैतमा पक्राउ परेका थिए ।

महानगरीय प्रहरी अपराध महाशाखाले ६७ थान थर्मलगनसहित नक्सालबाट उनलाई पक्राउ गरेको थियो । उनीमाथि ३ हजार पर्ने थर्मल गन १५ हजार रुपैयाँमा बेचेर कालो बजारी गरेको आरोप छ ।

अग्रवाल किर्गीस्तानका अवैतनिक महावाणिज्यदूतसमेत हुन् । प्रहरीले उनलाई कूटनीतिक नियोगको २०९सीसी १ नम्बरको गाडीसहित नियन्त्रणमा लिएको थियो ।

नेपाल एयरलाइन्सको विमान चार्टर्ड गरेर अग्रवालले चीनको ग्वाङझाओबाट ४ टन मेडिकल सामग्री ल्याएका थिए । सो सामान प्रचलित कानुनले तोकेभन्दा बढी नाफा लिएर बिक्री गरेको प्रहरी अनुसन्धानको निष्कर्ष छ ।