पोखरा, ११ वैशाख -कोरोना भाइरस (कोभिड १९) बाट संक्रमित बागलुङकी १९ वर्षीया युवतीको स्वाब परीक्षणमा नेगेटिभ रिपाेर्ट आएको छ । उनको पाँचौँ पटकको स्वाब परीक्षणका क्रममा नेगेटिभ रिपाेर्ट आएको हो ।

उनको पाँचौँ पीपीसीआर रिपार्ट नेगेटिभ आएको धौलागिरी अञ्चल अस्पतालका मेडिकल सुपरिन्टेन्डेन्ट डा. शैलेन्द्र पोखरेलले बताए ।गत चैत ४ गते कतार एयरवेजको बिमानबाट नेपाल आएकी काठमाडौंकी १ युवतीमा कोरोना भाइरसको संक्रमण देखिएपछि उनीसँग एउटै विमानमा आएका यात्रुहरूको पहिचाहन गरी जाँच गर्दा बागलुङ नगरपालिका– ४, कुँडुलेकी ती युवतीमा पनि संक्रमण देखिएको थियो । उनी नेपालको पाँचौँ संक्रमित हुन् ।

उनलाई चैत १५ गते कोरोना भाइरसको परिक्षणका क्रममा पोजिटिभ भएको पुष्टि भएपछि बागलुङ अस्पतालको आइसोलेसन वार्डमा राखिएको थियो । उनी बेल्जियमबाट फर्केकी थिइन् ।