एजेन्सी, बैशाख ९-भारतको उत्तराखण्डको एउटा गुफामा बसिरहेका एक नेपालीसहित ६ विदेशीलाई भारतीय प्रहरीले उद्धार गरी क्वारेन्टाइनमा राखेको छ । गुफामा लुकेर बसेकामध्ये दुई जना महिला समेत थिए । उनीहरु ऋषिकेशमा गंगा नदीको किनारस्थित गुफामा बसिरहेका थिए । उनीहरुलाई उद्दार गरेर भारतीय प्रहरीले स्थानीय धर्मशालामा क्वारेन्टाइनमा राखिएको जनाएको छ ।

सो स्थानमा एउटा होटलमा बसेका भएपनि लकडाउन लागू गरिएपछि होटलबाट गुफामा सारिएका थिए । होटलमा बस्न पैसा सकिएपछि उनीहरु गुफामा बस्न बाध्य भएका थिए ।

यसरी उद्धार गरि क्वारेन्टाइनमा राखिएकामा युक्रेनका ओलेह सान्डेत्स्की र ओक्साना क्राभ्चुक, टर्कीका मार्भे तुर्हान अमेरिकाका माइकल राफेल फाल्कोन, फ्रान्सका लाडिस्लास लुकास र नेपालका विष्णु गिरी रहेको भारतीय सञ्चारमाध्यमले उल्लेख गरेका छन् । उनीहरु भारतमा कोरोना भाइरसको संक्रमण फैलिन नदिन लकडाउन लागु भएको दिन २४ मार्चदेखि गुफामा सरेका थिए ।