विराटनगर । विराटनगरमा जारी चौथो संस्करणको एसईई कप अन्तरविद्यालयस्तरीय रनिङ शील्ड फुटबल प्रतियोगितामा डन बस्को, राधाकृष्ण, दिल्ली पब्लिक र साइ चिल्ड्रेन होम स्कुल विजयी भएका छन्।

आज सम्पन्न चार खेलमध्ये पहिलो खेलमा डन बस्को स्कुले बीकेभीएम स्कुललाई १–० गोल अन्तरले पराजित गर्‍यो। डन बस्कोका प्रकाश कामतले निर्णायक गोल गर्दै टिमलाई जित दिलाए।

दोस्रो खेलमा राधाकृष्ण माध्यमिक विद्यालय, विराटनगरले स्मृति आवासीय मावि, तरहरालाई १–० ले हरायो। सो खेलमा राधाकृष्णका निशान्त चौधरीले निर्णायक गोल गरे।

तेस्रो खेलमा दिल्ली पब्लिक स्कुलले जनता नमुना माविलाई २–० गोल अन्तरले पराजित गर्‍यो। दिल्ली पब्लिकका अमन खवासले दुबै गोल गर्दै टिमलाई सहज जित दिलाए।

चौथो खेलमा साइ चिल्ड्रेन होम, इटहरीले सत्यनारायण माविलाई १–० ले हरायो। साइ चिल्ड्रेनका सुशान्त चौधरीले निर्णायक गोल गर्दै टिमलाई विजयी बनाए।