विराटनगर । कोशी प्रदेश सरकारको आगामी आर्थिक वर्षका लागि ल्याइएको बजेटप्रति पूर्वमुख्यमन्त्री तथा एकीकृत समाजवादीका नेता राजेन्द्र राईले पुनः तीव्र असन्तुष्टि व्यक्त गरेका छन्। सोमबार बसेको प्रदेशसभा बैठकमा सम्बोधन गर्दै राईले बजेटलाई “हालसम्मकै झुरेष्ट” भन्दै कडा टिप्पणी गरे।

उनले मुख्यमन्त्री र मन्त्रीहरूले आफूसँग योजनाको सिफारिस मागेर पनि आफूले पठाएका कुनै पनि योजना बजेटमा समावेश नगरेको आरोप लगाए। “मुख्यमन्त्री र मन्त्रीहरूले आफूसँग भेटेरै योजना हाल्न लगाउनु भयो,” उनले भने, “तर, मैले सिफारिस गरेका १० वटा योजनामध्ये एउटै पनि बजेटमा परेन।”
पूर्वमुख्यमन्त्री राईले यो वर्षको बजेट प्रदेश इतिहासमै सबैभन्दा असमान र मनोमानी भएको दाबी गरे। उनका अनुसार बजेट विनियोजनमा मन्त्रालयको कार्यक्षेत्र विपरितका योजना समेत राखिएको छ।
उनले आरोप लगाए अनुसार, बजेट एउटै जिल्लामा केन्द्रित गरिएको छ, जुन अघिल्ला कुनै वर्षमा देखिएको थिएन। “आठ वटा बजेटको हिसाब निकालौं,” उनले चुनौती दिँदै भने, “यदि कुनै वर्ष अहिलेको जति एउटै जिल्लामा बजेट केन्द्रित भएको भेटिएन भने म विनियोजन विधेयकमा अब कहिल्यै बोल्नेछैन।”