विराटनगर । नेपाल औषधि व्यवसायी संघको ५२ औं स्थापना दिवसको शुभ अवसर पारेर विराटनगर ८ मा रहेको विराटेश्वर वृद्धाश्रममा स्वास्थ्य सामाग्री वितरण र भोजन कार्यक्रम सम्पन्न गरिएको छ।
नेपाल औषधि व्यवसायी संघ मोरङ शाखाले आयोजना गरेको सप्ताहव्यापी कार्यक्रमको पाँचौं दिनको कार्यक्रम अन्तर्गत आइतबार विराटेश्वर वृद्धाश्रममा बस्ने बृद्धबृद्धाहरूलाई आवश्यक स्वास्थ्य सामाग्री हस्तान्तरण गरिएको थियो। यस अवसरमा वृद्धाश्रमका सबै बासिन्दाहरूलाई स्वादिष्ट भोजन पनि प्रदान गरिएको थियो।
पाँचौं दिनको यस कार्यक्रमको संयोजकत्व संघकी सचिव सरिता श्रेष्ठले गरेकी थिइन्। कार्यक्रममा वृद्धाश्रमका बासिन्दाहरूले औषधि व्यवसायी संघको यस पहलको भरपूर प्रशंसा गरेका थिए। विशेषगरी स्वास्थ्य सामाग्रीको वितरणले उनीहरूको दैनिक आवश्यकतालाई पूरा गर्न महत्वपूर्ण भूमिका खेल्ने बताइएको छ।
संघका अध्यक्ष देशबन्धु ढकालले जानकारी दिंदै भने, ‘हाम्रो संघको स्थापना दिवसको अवसरमा समाजसेवामूलक यस्ता कार्यक्रमहरू आयोजना गर्न पाउँदा हामी गर्व महसुस गर्छौं। वृद्धाश्रममा बस्ने हाम्रा आमाबुवाहरूको सेवा गर्नु हाम्रो कर्तव्य हो।’
सोमबार बिहान १० बजेदेखि विराटनगरको अस्पताल चोकमा खुल्ला रक्तदान कार्यक्रम आयोजना गरिने अध्यक्ष ढकालले बताए। यो कार्यक्रमले रक्तदान गर्न चाहने सबै नागरिकहरूलाई सहभागी हुन आह्वान गरिएको छ।
सप्ताहव्यापी कार्यक्रम अन्तर्गत यसअघि संघले विभिन्न सामाजिक सेवामूलक गतिविधिहरू सञ्चालन गरिसकेको छ। विराटनगरको कोशी अस्पतालमा बिरामीहरूलाई फलफूल वितरण गरिएको थियो। त्यसैगरी मोरङ प्रहरीलाई स्वास्थ्य सामाग्री वितरण गरिएको थियो। विद्यार्थीहरूका लागि स्वास्थ्य सचेतनामूलक कार्यक्रम पनि आयोजना गरिएको थियो।
संघको स्थापना दिवसको अवसर पारेर यस्ता सामाजिक सेवामूलक कार्यक्रमहरू नियमित रूपमा सञ्चालन गर्दै जाने संघको प्रतिबद्धता रहेको ढकालले जनाए।