विराटनगर । नेपाल औषधि व्यवसायी संघ (एनसीडिए) को ५२औं स्थापना दिवसको अवसरमा मोरङ शाखाले सप्ताहव्यापी कार्यक्रम अन्तर्गत जिल्ला प्रहरी कार्यालय मोरङलाई स्वास्थ्य सामग्री प्रदान गरेको छ।

शनिबार आयोजित कार्यक्रममा संघले प्रहरी कार्यालयलाई आवश्यक स्वास्थ्य सामग्रीहरू हस्तान्तरण गरेको हो। यो कार्यक्रमको संयोजक संघको बरिष्ठ उपाध्यक्ष हरिराज रेग्मी हुन् ।

कार्यक्रमबारे जानकारी दिँदै एनसीडिए मोरङका अध्यक्ष देशबन्धु ढकालले संस्थाको सामाजिक उत्तरदायित्व अन्तर्गत स्वास्थ्य क्षेत्रसँग सम्बद्ध सरोकारवालाहरूलाई सहयोग गरिएको बताए ।

स्थापना कार्यक्रम अन्तर्गत यसअघि कोशी अस्पतालमा उपचाररत बिरामीहरूलाई फलफूल वितरण गरिएको थियो भने हिमालय दर्शन कलेज, विराटनगरमा लागू औषध तथा मनोदैहिक औषधिसम्बन्धी जनचेतनामूलक कार्यक्रम पनि सम्पन्न भइसकेको छ।

साथै आइतबार विराटनगर–८ स्थित विराटेश्वर वृद्धाश्रममा ‘भोजन कृष्णार्पण’ तथा स्वास्थ्य सामग्री वितरण कार्यक्रम आयोजना गरिने भएको छ ।