विराटनगर । नेपाल उद्योग वाणिज्य महासंघ कोशी प्रदेश र उदय परियोजनाको संयुक्त आयोजनामा सञ्चालित स्थानीय व्यवसाय विकास परामर्शदाताहरूको क्षमता विकास तालिम कार्यक्रम शुक्रबार सम्पन्न भएको छ।

विराटनगरमा सम्पन्न पाँचदिने तालिममा कोशी प्रदेशका विभिन्न जिल्ला तथा नगर उद्योग वाणिज्य संघहरूबाट सहभागी ३० जना प्रतिनिधिहरुले साना तथा मझौला उद्योग ९एसएमई० को प्रवद्र्धनमा व्यवसाय परामर्शदाताको भूमिकाबारे अभ्यासात्मक ज्ञान हासिल गरे।

तालिममा व्यावसायिक योजना निर्माण, लोन आवेदन प्रक्रिया, इथिकल स्ट्यान्डर्ड, सञ्चार तथा समन्वय, लैंगिक तथा सामाजिक समावेशीकरण, तथ्याङ्क सङ्कलन, र नतिजा मूल्यांकनजस्ता विषय समेटिएका थिए। साथै, उदय परियोजना र यसको कार्यक्षेत्रसम्बन्धी विस्तृत जानकारी समेत प्रदान गरिएको थियो।

समापन कार्यक्रममा कन्काई उद्योग वाणिज्य संघका महासचिव सरोज सिटौंलाले, “यो तालिमबाट व्यवसायिक परामर्शदाताको हैसियतमा साना तथा मझौला उद्यमीहरूलाई प्रत्यक्ष सहयोग गर्न सक्ने सीप प्राप्त भएको छ,” भने ।

त्यस्तै, खोटाङ उद्योग वाणिज्य संघका मदनबहादुर तामाङले तालिमले आफूलाई व्यवसाय योजना बनाउन सहयोग पुगेको उल्लेख गर्दै आगामी दिनमा उद्यमीहरूलाई मार्गदर्शन गर्न तयार रहेको बताए।

धनकुटाबाट सहभागी साङ्घेन्मा राईले भने, “महिला उद्यमीहरूका लागि यो तालिम प्रेरणादायक रह्यो। अबदेखि उनीहरूको व्यवसाय प्रवद्र्धनमा सक्रिय भूमिका खेल्नेछु।”

कार्यक्रमका प्रमुख अतिथि तथा नेपाल उद्योग वाणिज्य महासंघ कोशी प्रदेश अध्यक्ष राजेन्द्र राउतले प्रमाणपत्र वितरण गर्दै महासंघले जिल्ला तथा नगर संघहरूको क्षमता विकासमा निरन्तर सक्रिय रहेको बताए। उनले भने, “व्यवसाय विकास परामर्श सेवाको सुरुआतले साना तथा मझौला उद्यमीहरूलाई नयाँ उचाइमा पुर्‍याउनेछ। निकट भविष्यमै स्टार्टअप लक्षित कार्यक्रम सञ्चालन गर्ने तयारीमा छौं।”

उदय परियोजनाका बिजनेस डेभलपमेन्ट सर्भिस लिड विष्णु काफ्लेले तालिमले कोशी प्रदेशमा साना तथा मझौला उद्यमहरूलाई अझ प्रभावकारी रूपमा प्रोत्साहन गर्ने विश्वास व्यक्त गरे।