विराटनगर । कोशी प्रदेश खेलकुद विकास बोर्डले प्रदेश स्तरीय जुडो प्रतियोगिता आयोजनाको नाममा १० लाख रुपैयाँ बजेट विनियोजन गरेपछि त्यसको पारदर्शिता र निष्पक्षतामाथि प्रश्न उठेको छ ।
प्रतियोगिता सुरु हुनुअघि नै विवादमा फँसेको यो खेलमा प्रदेश खेलकुद विकास बोर्डको आन्तरिक राजनीति र सत्तासीन पार्टीको कार्यकर्ता पोस्ने चलखेलले प्रतियोगिताको विश्वसनीयता र उद्देश्यमै प्रश्न उठेको हो ।
प्रदेश खेलकुद बिकास बोर्डकी सदस्य तथा राष्ट्रिय जुडो प्रशिक्षक रोशनी राईले जुडो प्रतियोगिता एक निजी क्लब विराट कोशी जुडो क्लब लाई सुम्पिएर प्रतियोगिता गराउनु बोर्डको नीति विपरीत र गैरजिम्मेवार निर्णय भएको बताउँदै विरोध गरेकी छन् । ‘प्रदेशस्तरीय प्रतियोगिता बोर्डको आधिकारिक आयोजनामा हुनुपर्नेमा एक्कासि निजी क्लबका नाममा ब्यानर देख्दा म छक्क परेँ,’ प्रशिक्षक राई भन्छिन् । उनले यो निर्णयलाई सत्तासीन पार्टी एमालेको कार्यकर्ता पोस्ने रणनीतिको हिस्सा भन्दै सामाजिक सञ्जालमा तीव्र आक्रोश व्यक्त गरेकी छन् ।
‘कोशी प्रदेश खेलकुद विकास बोर्डको लागि म एक असक्षम सदस्य, अयोग्य प्रशिक्षक, अनि खेलाडी पनि होइन भन्ने मूल्यांकन गरिदिनु भएकोमा धन्यवाद,’ उनले सामाजिक संजालमा स्टाटस लेखेकि छिन् ।

यो प्रतियोगिताको आयोजन विराटनगर ६ मा रहेको विराट कोशी जुडो क्लबले गरेको छ । जसको संयोजक बिना बस्नेत छन् । सहआयोजक भने एमालेको भातृ संगठन नेपाल खेलकुद महासंघ मोरङ छ । सदस्य सचिव पर्शुराम बस्नेत आफैं नेकपा एमाले निकट रहेको नेपाल खेलकुद महासंघका अध्यक्ष हुन् । यसरी, बोर्डकै नेतृत्व तहबाट सिधै आफूनिकट संस्थालाई आयोजनाको जिम्मेवारी दिइनुले पारदर्शितामा गम्भीर प्रश्न उठाएको हो । बोर्डका सदस्य सचिव पर्शुराम बस्नेतलाई प्रतियोगिताबारे बुझन फोन सम्र्पक गर्न खोज्दा उनको फोन उठेन ।
सुनसरी जिल्ला गर्यो प्रतियोगिता बहिष्कार
विराटनगरको शहिद रंगशालाको कभर्ड हलमा सोमबारदेखि सुरु भएको प्रतियोगिता प्रदेश स्तरीय भनिए पनि केवल मोरङ, झापा, र सोलुखुम्बुका खेलाडी मात्र सहभागी छन् । सबैभन्दा बढी जुडोको खेलाडी रहेको जिल्ला सुनसरीले भने प्रतियोगिता बहिष्कार गरेको छ ।
सुनसरीका प्रशिक्षक राई भन्छिन्, ‘यदि खेलकुद विकास बोर्डकै आयोजनामा खेल हुने हो भने हामी सहभागी हुन्थ्यौं । तर, निजी क्लबलाई जिम्मा दिएर, कार्यकर्तामार्फत बजेट सक्ने नियतले गरिएको प्रतियोगितालाई समर्थन गर्न सकिंदैन ।’
प्रदेशस्तरीय प्रतियोगिता भनिएपनि विराटनगरसहित सहिद मैदान अगाडीको कभड हलमा १३२ जना खेलाडी र प्रशिक्षक सहभागी भएको यसअघि आयोजित पत्रकार सम्मेलनमा जानकारी गराएको छ । सहभागिता हुने जिल्लाको संख्याले पनि प्रतियोगिताको औचित्य र स्तरमाथि प्रश्न उठाएको छ ।
कोशी प्रदेश खेलकुद विकास बोर्डले लगातार राजनीतिक चलखेल, कार्यकर्ता पोस्ने र आफ्नै प्रभावमा रहेका संघसंस्थालाई लाभ दिलाउने नियतसहित काम गर्दै आएको आरोप पहिलेदेखि लाग्दै आएको छ । तर, यसपटकको जुडो विवादले त्यसलाई सार्वजनिक र स्पष्ट बनाइदिएको छ । एकातिर राष्ट्रिय प्रशिक्षकलाई अयोग्यु ठहर गर्दै बाहिर राख्ने, अर्कोतिर राजनीतिक नजिकको क्लबलाई सम्पूर्ण जिम्मेवारी सुम्पने चलनले खेलकुदको विकासभन्दा राजनीतिक स्वार्थ प्राथमिकतामा रहेको देखिन्छ ।