विराटनगर । नेपाल कम्युनिस्ट पार्टी (माओवादी केन्द्र) सम्बद्ध अखिल नेपाल खेलकुद महासंघ, मोरङको नयाँ अध्यक्षमा विवेक कर्ण चयन भएका छन्। ग्रामथान गाउँपालिका–१ झोराहाटमा सम्पन्न भेलाले कर्णको अध्यक्षतामा ३९ सदस्यीय नयाँ कार्यसमिति चयन गरेको हो।

पूर्व सितरियो कराँते खेलाडी तथा प्रशिक्षक रहेका कर्ण अब जिल्लास्तरमा माओवादी केन्द्र सम्बद्ध खेलकुद गतिविधिको नेतृत्व गर्नेछन्। समितिको उपाध्यक्षमा प्रमोद चौधरी र प्रदीप बस्नेत, सचिवमा गोपाल नेपाली, सह–सचिवमा विजय सरदार र कोषाध्यक्षमा दीपा चौधरी चयन भएका छन्।

भेलामा माओवादी केन्द्र कोशी प्रदेशका सचिव एवं प्रदेश सांसद गणेश उप्रेती ‘सुशिल’ प्रमुख अतिथिका रूपमा उपस्थित थिए। कार्यक्रममा संविधानसभा सदस्य एवं अखिल नेपाल खेलकुद महासंघका केन्द्रीय इन्चार्ज सन्तोष थारु, माओवादी केन्द्र मोरङका अध्यक्ष विजय विश्वास, कोशी प्रदेश समिति सदस्य ईश्वरी आचार्यलगायत नेताहरूले मन्तव्य राख्दै खेलकुदको माध्यमबाट युवालाई अनुशासन, राष्ट्रप्रेम र संगठन निर्माणमा जोड्नुपर्नेमा जोड दिएका थिए।

करीब २०० जना खेलकर्मीको सहभागितामा सम्पन्न कार्यक्रममा केही पदहरूमा भने मनोनयन प्रक्रिया बाँकी रहेको जनाइएको छ। नव–निर्वाचित अध्यक्ष कर्णले मोरङ जिल्लामा खेलकुदको समग्र विकास, खेलाडीको पहिचान र उनीहरूको हक–हितको संरक्षणका लागि नयाँ कार्यसमिति प्रतिबद्ध भएर लाग्ने बताए।