विराटनगर । विराटनगर आँखा (कर्निया) संकलन केन्द्रले विराट मेडिकल कलेज टिचिङ हस्पिटलमा आँखादानको महत्वबारे जनचेतना फैलाउने उद्देश्यले एक विशेष कार्यक्रम सम्पन्न गरेको छ।

कार्यक्रममा बोल्दै विराटनगर आँखा अस्पतालका नानी प्रत्यारोपण शल्यचिकित्सक डा. मनिष पाण्डेले आँखा दानसम्बन्धी विभिन्न पक्षमा जानकारी गराउँदै मृत्यु पश्चात गरिने यो पुण्य कार्यद्वारा एक व्यक्तिले दिएका दुई आँखाबाट दुई दृष्टिविहीन व्यक्तिको जीवनमा उज्यालो ल्याउन सकिने तथ्य प्रस्तुत गरे । उनले आँखादान कसले गर्न सक्छन्, र यससँग जोडिएका सामाजिक अवधारणाहरूको विषयमा समेत प्रकाश पारे ।

कार्यक्रमका प्रमुख अतिथि तथा अस्पतालका प्रशासक प्रमेश राज देवकोटाले आँखा दानजस्तो महत्त्वपूर्ण अभियान समाजमा सकारात्मक प्रभाव पार्ने विश्वास व्यक्त गर्दै भने, ‘आँखा दानको सन्देश हामी सबैले बुझ्न र अरुलाई पनि बुझाउन आवश्यक छ। यसको सुरुवात हामी अस्पतालका कर्मचारीबाट नै गर्नेछौं।’

कार्यक्रममा अस्पतालकी नर्सिङ सुपरिटेन्डेन्ड आयूष्मा शाक्य सहित ३१ जना स्वास्थ्यकर्मीहरूले स्वेच्छिक रूपमा आँखादानको फारम भरेर बुझाएका छन्। यो कार्यक्रमले स्वास्थ्यकर्मीहरूबीच आँखादानप्रति चेतना बढाउने मात्र नभई समाजमा पनि एउटा प्रेरणादायी सन्देश प्रवाह गर्ने विश्वास आयोजकले गरेका छन्।