विराटनगर। मोरङको कानेपोखरी गाउँपालिकामा सम्पन्न १० औं राष्ट्रिय सिएच आइटिएफ आइटिएफ तेक्वान्दोमा बाग्लुङ जिल्ला च्याम्पियन बनेको छ। कानेपोखरी गाउँपालिका ६ मा रहेको जनसेवा माविमा सम्पन्न तीनदिने प्रतियोगितामा बाग्लुङले २० स्वर्ण पदक जित्दै नगद १५ हजार, ट्रफी र मेडल सहित उपाधि चुमेको हो।

भक्तपुरले १४ स्वर्णसहित फर्स्ट रनरअप भई १० हजार नगद, ट्रफी र मेडल प्राप्त गर्‍यो। रुपन्देहीले ४ स्वर्णसहित सेकेन्ड रनरअप बन्‍न सफल भयो।

प्रतियोगितामा १२ जिल्लाका ३२५ खेलाडीहरू सहभागी भएका थिए। बेस्ट प्लेयर पुरुषतर्फ भक्तपुरका आयन श्रेष्ठ, रुपन्देहीका प्रिन्सि दर्लामी, भक्तपुरकी रेसा थापा र रेणी शाहीले उत्कृष्ट खेलाडीको पुरस्कार प्राप्त गरे।

खेलमा तेह्रथुमलाई अनुशासित टोली, मोरङलाई चौथो स्थान प्राप्त भयो।

कोशी प्रदेश सिएच आइटिफ तेक्वान्दो संघको आयोजनामा पहिलोपटक कानेपोखरीमा आयोजना भएको प्रतियोगिता विभिन्न तौल समूहमा सम्पन्न भएको थियो। समापन समारोहमा प्रमुख अतिथि गाउँपालिका अध्यक्ष राजमती इङ्नाम तथा संघका केन्द्रीय अध्यक्ष बुशल बुढा मगरसहित विशिष्ट अतिथिहरूको उपस्थिति थियो। कार्यक्रम अध्यक्ष युवराज भुजेलको सभापतित्वमा सम्पन्न भएको थियो।