विराटनगर । विराटनगर–१२ स्थित सम्पन्न बस्तीका केसलिया खोलाको बाढी पसेको छ । शनिबार बिहान बस्तीमा बाढी पस्दा १४५ घर जलमग्न भएको छ ।
बस्ती जोगाउन विराटनगर महानगरपालिका, नेपाल प्रहरी, सशस्त्र प्रहरी र स्थानीयको समन्वयमा अस्थायी तटबन्ध निर्माण गरिएको छ ।
केसलिया खोला सम्पन्न बस्तीको छेउबाट बग्छ । यस खोलाले वर्षायाममा बारम्बार डिल कटान गर्दै आएको छ । यही समस्या समाधानका लागि कोशी प्रदेश सरकारले तटबन्धनको काम थालेको थियो । तर, १ सय मिटर आवश्यक तटबन्धनमध्ये ५१ मिटर मात्रै निर्माण भएको छ । बाँकी ४९ मिटर अधुरो रहेकाले खोलाको धार बस्ती तर्फ मोडिएको हो ।