विराटनगर । मोरङ प्रहरीले हराएको सुन किन्ने र बेच्ने कार्यमा संलग्न तीन जनालाई पक्राउ गरेको छ। बिराटनगर–९ जलजला चोकबाट हराएको सुनसहित प्रहरीले विक्रेता र खरिदकर्तालाई नगदसहित नियन्त्रणमा लिएको हो।

भारत, कलकत्ताका सनातन प्रधानले जलजला चोकमा विगत १३ वर्षदेखि संचालन गर्दै आएको सुन कारखानामा कार्यरत मोहम्मद यासिनले सुन पालिस गरेर साइकलमार्फत फर्कने क्रममा सुनका गहना घोघापुल नजिकै बाटोमा खसाएका थिए। सुन पहेंलो प्लास्टिकको झोलामा राखिएको थियो।

सुन खसेको देखेपछि बिराटनगर–११ का १९ वर्षीय शिव मरिक र ऐराखे बस्ने १७ वर्षीय राजा मरिकले उक्त गहना उठाई लगेका थिए। घटनाबारे जानकारी पाएलगत्तै वडा प्रहरी कार्यालय बिराटनगरबाट खटिएको प्रहरी निरीक्षकको टोलीले सिसीटिभी फुटेजको सहायताले दुवै जनाको पहिचान गरी पक्राउ गरेको थियो।

सोधपुछका क्रममा ती युवाहरूले गहना केसलिया रोडका ५० वर्षीय मां ज्वेलर्सका संचालक अरविन्द स्वर्णकारलाई १ लाख ६० हजारमा बिक्री गरेको स्वीकारेपछि उनलाई पनि प्रहरीले नियन्त्रणमा लिएको छ।

प्रहरीले तीनैजनालाई नियन्त्रणमा लिई थप अनुसन्धान थालेको जनाएको छ। उनीहरूबाट सुनजस्तो देखिने गहना तथा नगद रकमसमेत बरामद गरिएको मोरङ प्रहरीका प्रवक्ता डिएसपी वेद प्रकाश जोशीले जानकारी दिए । प्रहरीले उनीहरुको साथबाट ब्रासलेट सुनजस्तो, मोती बुनेको २ थान, नथिया सुनजस्तो देखिने १ थान, कुन्डल झुम्का – २ थान, मनटिका १ थान, महिलाको औँठी – १ थान, फुली – १ थान, नगद १ लाख ६९ हजार ५ सय बरामद भएको डीएसपी जोशीले जानकारी दिए । पक्राउ परेका तीनैजनालाई आवश्यक कानुनी कारवाहीका लागि जिल्ला प्रहरी कार्यालयमा राखिएको छ।