विराटनगर । सम्झौता गरेर व्यापार व्यवसाय गरे कुनैपनि औषधि व्यवसायीले भुक्तानीको समस्या भोग्नु नपर्ने एक कार्यक्रममा सहभागी सरोकारवालाहरुले बताएका छन् ।
नेपाल औषधि व्यवसायी संघ मोरङ शाखाले बिहीबार विराटनगरमा आयोजना गरेको थोक व्यवसायीहरुको भेलामा सहभागी सरोकारवालाहरुले भुक्तानीको समस्याका कारण औषधि व्यवसायीहरुले समस्या भोग्दै आउनु परेकोले व्यापारिक कारोवार गर्दै सम्झौता गरेरमात्र गरे समस्या नआउने बताएका हुन् ।
उनीहरुले औषधि व्यवसायी संघले बनाएको नो ओब्जेक्सन सर्टिफिकेट (एनओसी) गरेर कुनैपनि व्यवसायीले कुनैपनि व्यापारिक फर्मसँग कारोवार गर्न जोड दिंदै एनओसी गरेर कारोवार गरे कुनै समस्यामा नपर्ने दावी गरे । कार्यक्रममा नेपाल औषधि व्यवसायी संघका थोक तर्फका केन्द्रीय सदस्य गौतम गुप्ताले सम्झौता अनुसारको काम नगर्दा समस्या हुने गरेको भन्दै समस्या जसलाई परेपनि एनसिडिएको शाखा कार्यालयमा निवेदन दिन व्यवसायीहरुलाई आग्रह गरे । उनले आयातकर्ता (सुपर स्टोकिष्ट) का कारण थोक र खुद्रा व्यवसायीलाई समस्या भइरहेकोले सबै व्यवसायीहरुलाई पोष्ट डेटेड चेक (पिडिसी) मा नगरि कि त नगदमा कि त उधारोमा मात्र कारोवार गर्न आग्रह गरे ।
नेपाल औषधि व्यवसायी संघ कोशी प्रदेश समितिका अध्यक्ष धनबहादुर काफ्लेले सबै थोक व्यवसायी एकजुट भएर कारोवार गरे खुद्रा व्यवसायीले बद्मासी गर्न नसक्ने बताए । उनले कुनैपनि औषधि व्यवसाय सम्बन्धी समस्या व्यक्तिगत रुपमा भन्दा सामूहिक रुपमा संघ मार्फत समाधान खोज्दा पूर्णता पाउने भएकोले सबै औषधि व्यवसायीहरुलाई संघमा निवेदन दिन आग्रह गरे ।
नेपाल औषधि व्यवसायी संघ कोशी प्रदेशका निवर्तमान अध्यक्ष कुमार खतिवडाले आवश्यकता भन्दा वढी थोक व्यवसायीहरु हुँदा अस्वस्थ प्रतिष्पर्धा बढेका कारण भूक्तानीमा समस्या आइरहेको भन्दै नयाँ थोक व्यवसायी बनाउँदा उत्पादक तथा आयातकर्ताले अगाडीदेखि कारोवार गर्दै आएका थोक व्यवसायीलाई जानकारी गराए कुनै समस्या नआउने बताए ।
कार्यक्रममा संघका मोरङ अध्यक्ष देशबन्धु ढकालले नो अब्जेक्सन सर्टिफिकेट (एनओसी) गरेर र पोष्ट डेटेड चेक(पिडिसी) नदिई गरिने कारोवारलाई पूर्ण कार्यान्वयनमा ल्याउनसके कुनैपनि समस्या आउन नसक्ने दावी गर्दै सबै औषधि व्यवसायीहरुलाई एनओसी गरेर र नगद तथा उधारोमामात्र कारोवार गर्न आग्रह गरे । उनले आयातकर्ता (सुपर स्टोकिष्ट) का कारण थोक र खुद्रा व्यसायीहरु समस्यामा परिरहेकोले थोक र खुद्रा औषधि व्यवसायीहरु एकजुट भएर आफुलाई परेको समस्या समाधानमा लाग्न सुझाव दिए । उनले उपभोग म्याद गुज्रीएका औषधि खुद्राले १८ महिना भित्र थोक व्यवसायीलाई पठाउनुपर्ने र २१ महिनाभित्र थोकले आयातकर्ता(सुपर)लाई पठाइसक्नुपर्ने भएपनि सुपरले त्यो अनुरुप क्षतीपूर्ति नदिंदा थोक व्यवसायी मारमा परिरहेकोले थोक व्यवसायी एकजुट भएर दबाव दिन आवश्यक भएको बताए ।
औषधि व्यवसायी संघले एनओसी धेरै अगाडीदेखि लागु गरेपनि औषधि व्यवसायीहरुले त्यसको पालना नगर्दा समस्या आउने गरेको र त्यसलाई उत्पादक, आयातकर्ता , थोक र खुद्रा व्यवसायीहरुले पालना गर्न सरोकारवालाहरुले जोड दिएका थिए ।
कार्यक्रममा विराटनगरमा रहेका ५० जना भन्दावढी औषधि व्यवसायीहरुको सहभागीता रहेको थियो ।