विराटनगर । कोशी प्रदेश प्रहरी कार्यालय विराटनगरका प्रमुख प्रहरी नायब महानिरीक्षक (डिआइजी) ईश्वर कार्कीले सीमा सुरक्षा व्यवस्थापनमा प्रहरी प्रशासन तेस्रो तहमा रहेर पनि अग्रपंक्तिमा काम गरेको बताएका छन् ।
प्रदेश प्रहरीको नेतृत्व सम्हालेको १५ दिनपछि सोमबार प्रदेश प्रहरी कार्यालय परिसरमा संचारकर्मीहरुसँगको परिचयात्मक कार्यक्रममा उनले यस्तो बताएका हुन् ।

नेपाल सरकारले सीमा सुरक्षा व्यवस्थापनमा तीन तहको संरचना बनाएको छ । पहिलो तहमा भन्सार तथा राजस्व विभाग, दोस्रो तहमा सशस्त्र प्रहरी बल, र तेस्रो तहमा नेपाल प्रहरी रहने व्यवस्था छ । डिआइजी कार्कीले नेपाल प्रहरी तेस्रो तहमा मात्र सीमित नरही, धेरैपटक पहिलो तहको भूमिकासमेत निर्वाह गर्दै आएको बताए ।
उनले तथ्याङ्कको हवाला दिँदै भने, ‘हामी तेस्रो तहमा बसेर पनि पहिलो तहको परिणाम दिन सफल भएका छौं । सीमामा हामीले गरेका हस्तक्षेप, नियन्त्रण तथा अनुसन्धानले त्यसको पुष्टि गर्छ ।’ उनले यसप्रकारको भूमिकाले प्रहरीको कार्यक्षमता र समर्पण स्पष्ट भएको उल्लेख गरे ।
डिआइजी कार्कीले कोशी प्रदेशमा लागूऔषध समस्या अत्यन्त गम्भीर अवस्थामा रहेको जनाउँदै यसलाई आफ्नो प्रमुख प्राथमिकतामा राखिएको बताए । ‘ड्रग्सको सहज उपलब्धता, विशेष गरी सीमावर्ती भारतीय बजारबाट नेपाल भित्रिने प्रवृत्ति, हाम्रो लागि चिन्ताको विषय हो,’ उनले भने ।
डिआइजी कार्कीका अनुसार लागूऔषधको रोकथामका लागि प्रदेश सरकार र स्थानीय सरकारसँग समन्वयमा रहेर संयुक्त कार्यक्रम संचालन गरिनेछ । भारतसँग सिधा सिमा जोडिएका जिल्लाहरुमा लागूऔषधको अबैध ओसारपसार बढेको उल्लेख गर्दै उनले भारतीय पक्षसँग काउन्टरपार्ट मिटिङमार्फत गम्भीर छलफल भइरहेको जानकारी दिए ।
डिआइजी कार्कीले १५ दिनमा कोशी प्रदेश प्रहरीले अपराध नियन्त्रणको क्षेत्रमा उल्लेखनीय सफलता हात पारेको दाबी गरे । १५ दिनको छोटो अवधिमा ४५ जना फरार अभियुक्तहरुलाई पक्राउ गरी कानुनी दायरामा ल्याइएको जानकारी दिँदै उनले अपराध नियन्त्रणमा प्रहरी गम्भीर रहेको सन्देश दिन खोजे । उनले भने, ‘प्रहरीको मूल काम भनेको कानूनको पालना गराउनु हो । कोशी प्रदेशमा कुनै पनि अपराध भएमा त्यसको तत्काल अनुसन्धान गरेर दोषीलाई कारवाहीको दायरामा ल्याइनेछ ।’
तस्करी नियन्त्रण, चोरी निकासी रोकथाम, र भन्सार छल गर्नेहरुको विरुद्धमा गरिएको कारवाहीबाट प्रदेश प्रहरीले ४ करोड रुपैयाँभन्दा बढी राजस्व संकलन गरेको डिआइजी कार्कीले जानकारी दिए ।