विराटनगर । विराटनगर ३ स्थित मानगढ खानेपानी आयोजनाको व्यवस्थापन गर्ने विराट खानेपानी उपभोक्ता संस्थाको अध्यक्षमा नेकपा एमालेको विद्रोही समूहका उम्मेदवार लालमणी भट्टराई निर्वाचित भएका छन् ।

भट्टराईले १ हजार ८८९ मत प्राप्त गर्दै एमाले संस्थापन पक्षका उम्मेदवार रामबहादुर घिमिरे १ हजार १५४ मत र कांग्रेस उम्मेदवार दुर्गा चापागाईं ६३५ मत लाई पराजित गरेका हुन् ।

पराजित घिमिरे वर्तमान अध्यक्षसमेत हुन् । उपभोक्ता समितिको महिला उपाध्यक्षमा सावित्रा पोखरेल निर्वाचित भइन् । खुला उपाध्यक्षमा भोलानाथ घिमिरे निर्वाचित भए । सचिवमा प्रदीपकुमार नेपाल निर्वाचित भए । कोषाध्यक्षमा सरोज घिमिरे निर्वाचित भए । कोशी प्रदेशमा नेकपा एमाले भित्र विद्रोही समूहको नेतृत्व विनोद ढकालले गरिरहेका छन् । कुनै समय प्रधानमन्त्री केपी शर्मा ओलीका प्रिय ढकाल अहिले पूर्वराष्ट्रपति विद्यादेवी भण्डारी समूहमा छन् ।

गत वर्ष मानगढ खानेपानीकै निर्वाचनको विषयले एमाले मोरङमा भाँडभैलो मच्चिएको थियो । संस्थापन पक्षले पार्टीको आधिकारिक उम्मेदवारविरुद्ध लागेको भन्दै ढकाल समूहका तत्कालीन नगर अध्यक्ष सागर थापा, नवराज नेपाल र लालमणि भट्टराईलाई कारबाही गरेको थियो । एमालेको आन्तरिक कलहका कारण २०८१ जेठ १९ गते भएको मतदान विवादित बन्यो । उच्च अदालत विराटनगरले पुनः मतदान गर्नुपर्ने फैसला गरेको थियो ।

यसअघि दिव्यराज कट्टेलसहित तीन जनाले मतपेटिकाको मत गणना गर्न र टंकप्रसाद खतिवडासहित अन्य तीन जनाले पुनः मतदानको माग गर्दै छुट्टाछुट्टै रिट दायर गरेका थिए ।
मानगढ खानेपानीको विवादको असर १० औं मोरङ जिल्ला अधिवेशन र विराटनगर महानगरको अधिवेशनमा देखिएको थियो । गत फागुनको जिल्ला अधिवेशनमा ढकाल समूहका अजम्बर राई अध्यक्षमा निर्वाचित भएका थिए । वैशाख २–३ गतेको विराटनगर महानगर अधिवेशनमा पनि ढकाल समूहका बलराम गिरी अध्यक्षमा निर्वाचित भएका थिए ।
एमाले मोरङ उपाध्यक्ष सागर थापाले एक वर्षअघि मानगढ खानेपानीबाट सुरु भएको विवाद मानगढमै आएर टुंगिएको भन्दै राम्रो सन्देश दिएको बताए । नेकपा एमाले नेता विनोद ढकालले सार्वजनिक संस्थानमा पार्टीले हस्तक्षेप गर्न नहुने सन्देश दिएको बताए ।
मानगढ खानेपानी आयोजनामा ५ हजार ९८८ उपभोक्ता मतदाता रहेका थिए । शनिबारको निर्वाचनमा ३ हजार ९६४ मत खसेको थियो भने २ हजार २४ जना मतदानमा सहभागी भएनन् ।