विराटनगर । त्रिभुवन विश्वविद्यालय क्षेत्रीय परीक्षा नियन्त्रक कार्यालय विराटनगरमा अखिल नेपाल राष्ट्रिय स्वतन्त्र विद्यार्थी युनियन क्रान्तिकारीले लगाएको तालाबन्दी आज सहमतिको माध्यमबाट खुल्ला गरिएको छ । पाँच दिनदेखि चलेको तालाबन्दी वार्ताका माध्यमबाट समाधान गरिएको हो।
संगठनले गत जेठ ६ गते कार्यालय प्रमुख डा गोविन्द गुरागाईंको कार्यकक्षमा तालाबन्दी गरेको थियो। बीबीएस र बीएससी पुरानो कोर्सका मौका परीक्षार्थीहरूको परीक्षा केन्द्र टाढा तोकिएको विषयमा उठेको असन्तुष्टि नै मुख्य कारण थियो।
कोशी र मधेश प्रदेशका केही जिल्लाका १०६ क्याम्पसमा अध्ययनरत विद्यार्थीहरूको मौका परीक्षाको केन्द्र झापाको दमक बहुमुखी क्याम्पसमा तोकिएको थियो। यस निर्णयले सोलुखुम्बुदेखि ताप्लेजुङ र सप्तरी सम्मका विद्यार्थीलाई लामो दूरी यात्रा गर्न बाध्य बनाएको भन्दै संगठनले विरोध जनाएको थियो।
विद्यार्थी नेताहरूले परीक्षा नियन्त्रक कार्यालयका प्रमुख डा गुरागाईं तालाबन्दीको अवधिमा कार्यालयमा उपस्थित नहुनु, विद्यार्थीहरूका गुनासोप्रति बेवास्ता गर्नु र समन्वयको कमी भएको आरोप लगाएका थिए।
प्रारम्भिक वार्ता जेठ ८ गते परीक्षा नियन्त्रक कार्यालयको पहलमा सम्पन्न भएको पहिलो वार्तामा कार्यालय प्रशासन प्रमुख गोपाल प्रसाद घिमिरे, डा. गोविन्द गुरागाईं, डिग्री क्याम्पसका प्रमुख ढकबहादुर मगर र विद्यार्थी संगठनका अध्यक्ष प्रितम साह, इन्चार्ज शशी यादव लगायतको सहभागिता थियो।
आइतबार बसेको औपचारिक वार्तामा कार्यालयको तर्फबाट प्रमुख गोपाल प्रसाद घिमिरे, सह परीक्षा नियन्त्रक डा. गोविन्द गुरागाईं र क्याम्पस प्रमुख ढकबहादुर मगरको सहभागिता थियो।
अनेरास्ववियुको तर्फबाट महानगर उपाध्यक्ष केशव राजवंशीको नेतृत्वमा कोषाध्यक्ष आशिष राय, सदस्य चन्दन यादव, महानगर अध्यक्ष प्रितम साह, इन्चार्ज शशी यादव र डिग्री क्याम्पसका अध्यक्ष दर्शन शाहले भाग लिएका थिए।