विराटनगर । कोशी प्रदेश सरकारको पत्रकारिता पुरस्कार दलीय भागबण्डामा बाँड्ने तयारीविरुद्ध समाजवादी प्रेस संगठन कोशीले विरोध जनाएको छ ।
संगठनले सरकारलाई कडा चेतावनी दिँदै तत्काल यो अन्यायपूर्ण प्रक्रिया रोक्न माग राख्दै आइतबार आन्तरिक मामिला तथा कानुन मन्त्रालयका सचिव रामप्रसाद आचार्यलाई ज्ञापनपत्र बुझाएको छ । ‘योग्य र निष्पक्ष पत्रकारहरूको अपमान गर्ने यो षड्यन्त्र कहिल्यै सहने छैनौं । पुरस्कार वितरण निष्पक्ष मापदण्डमा आधारित हुनुपर्छ, राजनीतिक सम्झौताको विषय होइन,’ संगठनका प्रदेश अध्यक्ष बन्धु पोखरेलले बुझाएको ज्ञापनपत्रमा उल्लेख छ ।
संगठनले कोशी सरकारमाथि सञ्चार क्षेत्रको बजेट दुरुपयोग गरेको गम्भीर आरोप लगाएको छ । ‘सञ्चार सुदृढीकरणको नाममा विनियोजित बजेट बिचौलिया र निकटस्थहरूमा गइरहेको छ । एउटा शीर्षकमा बजेट माग गरेर अर्कै शीर्षकमा खर्च गर्ने, अधिकारीहरू आँखा चिम्लेर मिलेमतोमा संलग्न हुने । यो कहाँको न्याय हो ?,’ संगठनले प्रश्न गरेको छ ।
नागरिकको करबाट सञ्चित राजस्वको अपमान गरेको ठहर गर्दै तत्काल अन्त्य गर्न माग गरेको छ । संगठनले सरकारलाई अन्तिम चेतावनी दिँदै भनेको छ, ‘यदि सरकार यी विकृतिहरू अन्त्य गर्न गम्भीर भएन भने संघर्षको बाटो समाउन पछि पर्दैनौं ।’
प्रदेश सरकारले प्रत्येक वर्ष पत्रकारीता दिवसमा पुरस्कार वितरण गर्दै आएको छ । यो वर्ष जेठ १५ गते गणतन्त्र दिवसको अवसरमा प्रदेश सरकारले पुरस्कार वितरण गर्ने तयारी गरेको छ ।