विराटनगर – विराटनगर २ स्थित शनिहाटमा सञ्चालित नृत्य प्रशिक्षण विद्यालय ‘नृत्योपासना’ले विद्यार्थीहरूको वार्षिक मूल्याङ्कन परीक्षा सफलतापूर्वक सम्पन्न गरेको छ।

बिहिबार र शुक्रबार गरी दुई दिनसम्म सञ्चालन भएको यो मूल्याङ्कन परीक्षामा प्राथमिक तहदेखि चौथो वर्षसम्मका कुल २२ जना छात्राहरूले सहभागिता जनाएका थिए। सबै सहभागी छात्राहरू परीक्षामा उत्तीर्ण भएर अर्को चरणमा प्रवेश गरेका छन्।

विद्यार्थीहरूलाई भरतनाट्यम विधामा प्रशिक्षण प्रदान गर्दै आएकी नृत्योपासना विराटनगरकी सञ्चालक तथा प्रशिक्षक सन्तोष निधि राठीले भारतको चेन्नाईबाट यस विधामा स्नातकोत्तर तह पूरा गरेकी हुन्। उनले विद्यार्थीहरूलाई गुणस्तरीय नृत्य प्रशिक्षण उपलब्ध गराइरहेकी छिन्।

परीक्षा सम्पन्न भएपछि आयोजित समारोहमा सफल विद्यार्थीहरूलाई प्रमाणपत्र वितरण गरिएको छ। यस अवसरमा विद्यार्थीहरूका अभिभावकहरूको समेत उपस्थिति रहेको थियो।

प्रशिक्षक राठीका अनुसार नृत्योपासना विराटनगरमा शास्त्रीय संगीतका विभिन्न रागहरूमा आधारित नृत्य प्रशिक्षण नियमित रूपमा सञ्चालन भइरहेको छ। यस संस्थाले स्थानीय युवाहरूमा शास्त्रीय नृत्यप्रतिको रुचि बढाउन महत्वपूर्ण योगदान पुर्याइरहेको छ।