विराटनगर । विराटनगरमा सीप उत्सव २०८२ हुने भएको छ । उद्योग संगठन मोरङले जेठ १० र ११ गते विराटनगरमा सीप उत्सव महोत्सव गर्ने भएको हो ।
विराटनगरमा बिहीबार पत्रकार सम्मेलन गरी सीप उत्सवको माध्यमबाट तालिम प्रदायक, उद्योग प्रतिष्ठानहरू, नेपाल सरकारका सरोकारवाला पक्षहरू र प्रशिक्षार्थीहरू बीचको समन्वयलाई थप प्रगाढ बनाई आगामी दिनमा आवश्यकता अनुरूपको दक्ष जनशक्ति उत्पादन गर्ने रोजगारका अवसरको सुनिश्चितताका गर्नका लागि सीप उत्सव आयोजनाको तयारी गरिएको बताएको छ ।
निजी क्षेत्रको नेतृत्वमा सीप, दक्षता प्रदर्शन तथा वृत्ति परामर्श करियर काउन्सेलिग र अनुभव साटासाट गर्ने अभिप्रायका सीप उत्सव आयोजना गरिएको उद्योग संगठन मोरङका अध्यक्ष राकेश सुरानाले जानकारी दिए ।
सीप उत्सवमा पूर्व वाल विकास सहजकर्ता, सूचना प्रविधि, होटल म्यानेजमेन्ट र इलेक्ट्रिकल विधामा प्रत्यक्ष तालिमका साथै एक हजारभन्दा बढी विद्यार्थी युवाहरूको करियर काउन्सेलिङ सत्रहरू आयोजना गरिने आयोजकको भनाई छ । उत्सवमा सूचना प्रविधि, होटल व्यवस्थापन, इलेक्ट्रिकल इन्जिनियरिङ र अटो मोबाइल इन्जिनियरिङतर्फका विद्यार्थीहरू, उद्योग प्रतिष्ठानका प्रतिनिधिहरू, प्राविधिक शिक्षालयहरू, सूचना प्रविधि, हस्पिटेलिटी, अटोमोवाईलका क्षेत्रहरू सहभागी हुने अध्यक्ष सुरानाले बताए । उद्योग संगठन मोरङले यो उत्सवलाई सीप उत्सवको रूपमा पहिलो पटक आयोजना गर्न लागिएको दाबी गरेको छ ।