विराटनगर । गृहमन्त्री रमेश लेखकले कांग्रेस–एमाले नेतृत्वको सत्ता गठबन्धनमा कुनै खटपट नरहेको स्पष्ट पारेका छन् । आइतबार विराटनगरमा आयोजित एक कार्यक्रममा बोल्दै उनले यो गठबन्धन सहमतिको आधारमा बनेको भन्दै पाँच वर्षको पूर्ण कार्यकाल सफलतापूर्वक पूरा गर्ने विश्वास व्यक्त गरे ।
‘एमाले र काँग्रेसबीचको सहमतिले बनेको यो सरकार मुलुकमा व्याप्त निराशालाई चिर्दै आशाको किरण दिन गठित भएको हो,’ मन्त्री लेखकले भने, ‘गठबन्धनमा अहिले सम्म कुनै समस्या देखिएको छैन ।’
गृहमन्त्री लेखकले संविधान र लोकतान्त्रिक व्यवस्थामाथि कुनै पनि प्रकारको प्रहार स्वीकार्य नहुने पनि प्रस्ट पारे । उनले संघीयता, ‘लोकतन्त्र र गणतन्त्रका लागि नेपाली जनताले दिएको ठूलो त्याग र बलिदानलाई सम्झाउँदै वर्तमान व्यवस्थालाई उल्ट्याउने कोसिस सह्य नहुने बताए ।
‘धेरै नेपालीको बलिदानबाट प्राप्त उपलब्धिलाई उल्ट्याउने र निरंकुशतातर्फ लैजाने कुनै प्रयास हामी सहन सक्दैनौं,’ उनले भने, ‘अब देश फेरि निरंकुशतातिर फर्किने चाहना जनतामा छैन ।’