विराटनगर । नेपाल औषधि व्यवसायी संघ (NCDA) मोरङ शाखाले औषधि व्यवसायमा गहिरो संकट उत्पन्न भएको भन्दै तत्काल सुधारको माग गर्दै एक विज्ञप्ति जारी गरेको छ।

संघले औषधि व्यवसायको ५२ वर्षे इतिहासलाई स्मरण गर्दै, अहिलेको आर्थिक मन्दी, तरलता र अन्य संकटका कारण औषधि व्यवसाय नै संकटमा परेको जनाएको छ।

संघका अध्यक्ष देशबन्धु ढकालद्वारा हस्ताक्षरित विज्ञप्तिमा भनिएको छ, “औषधिको व्यवसाय संकटोन्मुख अवस्थामा छ, यसको समाधान सबै पक्षले एक भएर मात्र सम्भव छ।” संघले केन्द्रले जारी गरेको क्षतिपूर्ति नियमावली अक्षरशः पालन गर्नुपर्ने र प्रदेश तहमा पारित निर्णयहरु — जस्तै PDC चेकको प्रयोग नगर्ने, NOC को पूर्ण कार्यान्वयन गर्ने—आफ्नो ठोस मागको रुपमा प्रस्तुत गरेको छ। त्यस्तै, संघले निर्यातकर्ता तथा उत्पादकहरुलाई प्रत्येक व्यवसायीलाई आधिकारिक प्रमाणपत्र तत्काल उपलब्ध गराउन अपिल गर्दै, हाल संशोधन प्रक्रियामा रहेको औषधि ऐनलाई व्यावसायिक हितमैत्री बनाउनेतर्फ ध्यान दिन आग्रह गरेको छ।

स्वास्थ्य बीमाको पहुँच सर्वसाधारणका लागि सहज भए पनि औषधि व्यवसायीहरु त्यो सेवाबाट बञ्चित भएको भन्दै संघले गुनासो गरेको छ। अस्पताल फार्मेसीबाहेकका व्यवसायीहरुले बीमाका औषधि विक्री गर्न नपाउनु र रिजर्भ एन्टिबायोटिकहरू अस्पताल फार्मेसीमा मात्र सीमित गर्नुजस्ता नीतिहरु व्यवसायीका लागि प्रतिकूल रहेको जनाइएको छ। संघले सरकारको नीति विरोधाभासपूर्ण रहेको भन्दै एकातर्फ चिकित्सकले लेखेका आयातित फुड सप्लिमेन्ट फार्मेसीमा राखेर बिक्री गर्दा अर्को निकायले जफत गर्नु उचित नभएको उल्लेख गरेको छ।

त्यस्तै, संघमा दर्ता नभएका व्यवसायीहरुले संघको लोगो प्रयोग गर्नु गैरकानुनी भएको भन्दै अनुगमनलाई संघसँग नजोड्न अनुरोध गरिएको छ। अन्त्यमा, अस्पताल फार्मेसीमा आपूर्ति गरिने औषधिहरु सम्बन्धित जिल्लाका थोक व्यवसायीलाई जानकारी दिएर मात्र आपूर्ति गरिनुपर्ने र त्यसमा आइएनएस छाप अनिवार्य लगाउनुपर्ने माग पनि उठाइएको छ। नेपाल औषधि व्यवसायी संघ मोरङ शाखाले प्रस्तुत यी मागहरु तत्काल सम्बोधन नगरे औषधि व्यवसायीहरु पलायन हुने अवस्था निम्तिने चेतावनी दिएको छ।

You sent