विराटनगर । विराटनगर १० स्थित अर्किड स्कुलले एसईई परीक्षा दिइसकेका ३९ जना विद्यार्थीहरुलाई आइतबार एक भव्य समारोहको आयोजना गरी विदाई गरेको छ।
स्कुलका प्रिन्सिपल सिएम श्रेष्ठका अनुसार विराटनगरको श्रीकृष्ण पार्टी प्यालेसमा आयोजित कार्यक्रममा वर्षभरि विभिन्न विधामा उत्कृष्ट प्रदर्शन गर्ने विद्यार्थीहरुलाई अवार्ड तथा पुरस्कार प्रदान गरिएको थियो।

कार्यक्रममा विदाई हुने विद्यार्थीहरुले वर्षभरिको आफ्नो शैक्षिक यात्राका तिता मिठा अनुभवहरू सुनाएका थिए। कार्यक्रमलाई थप मनोरञ्जनात्मक बनाउन विद्यार्थीहरुले विभिन्न सांस्कृतिक कार्यक्रम तथा नृत्य प्रस्तुतिहरू पनि प्रस्तुत गरेका थिए, जसले उपस्थित शिक्षक शिक्षिका तथा विद्यार्थी साथीहरूलाई भरपुर मनोरञ्जन दिएको थियो।
विदाई समारोहमा स्कुलका प्रिन्सिपल श्रेष्ठले विद्यार्थीहरूलाई आगामी शैक्षिक यात्राको सफलताको शुभकामना दिँदै, अबको तीन महिनाको अवधिमा विभिन्न सीपमूलक कोर्सहरू अध्ययन गरेर आफूलाई अब्बल बनाउन आग्रह गरे। उनले विद्यार्थीहरूलाई माध्यमिक तहको भावी अध्ययनका लागि राम्रो कलेज रोज्न समेत सुझाव दिए।

कार्यक्रममा संस्थाका निर्देशक तथा पूर्व प्रिन्सिपल दीपेश बास्तोला, निर्देशक उमेश कार्की, भाइस प्रिन्सिपल पिके कामत र ओम यादवले पनि विद्यार्थीहरूलाई आगामी शैक्षिक यात्राको सफलताको शुभकामना दिएका थिए।
स्कुलका शिक्षक राकेश साहको सञ्चालनमा भएको यस समारोहमा स्कुलका शिक्षक शिक्षिका तथा एसईई परीक्षा दिएका सबै विद्यार्थीहरूको उपस्थिति रहेको थियो।