विराटनगर । नेपाल औषधि व्यवसायी संघ मोरङ शाखाले रिर्जभ एन्टिबायोटिक्स औषधि सबै फार्मेसीमा बिक्री वितरण गर्न पाउनुपर्ने माग अघि सारेको छ ।
बेलबारीमा आयोजित अन्तरक्रिया तथा छलफल कार्यक्रममा व्यवसायीहरूले हालै औषधि व्यवस्था विभागले गरेको निर्णयको विरोध गरेका हुन् ।
औषधि व्यवस्था विभागले फागुन २५ गतेदेखि रिर्जभ एन्टिबायोटिक्सको अनुचित प्रयोग र दुरुपयोग बढेको भन्दै यस्ता औषधिहरू अस्पताल भित्रका फार्मेसीमा मात्र बिक्री वितरण गर्न पाइने निर्णय गरेको थियो । यस निर्णयका कारण अस्पताल बाहिरका फार्मेसीहरू प्रत्यक्ष प्रभावित हुने भन्दै व्यवसायीहरू आक्रोशित देखिएका छन् ।
कार्यक्रममा बोल्दै नेपाल औषधि व्यवसायी संघ मोरङका अध्यक्ष देशबन्धु ढकालले विभागको निर्णय हचुवा र अवैज्ञानिक भएको बताए । ‘यो निर्णय कुनै वैज्ञानिक आधारबिना र एकतर्फी रूपमा लिइएको छ,’ उनले भने । ढकालका अनुसार यस प्रतिबन्धले अस्पताल बाहिरका फार्मेसीहरू विस्थापित हुने खतरा बढेको छ । ‘यसरी अस्पताल भित्रको फार्मेसीमा मात्रै विक्री वितरण गर्दा बाहिरका फार्मेसीहरू विस्थापित हुने खतरा बढेको छ,’ ढकालले भने, ‘डिडीएको यो गलत निर्णय सच्याउन जोडदार माग गर्दछु ।’
कार्यक्रममा औषधि व्यवसायी संघ कोशी प्रदेशका अध्यक्ष धनबहादुर काफ्लेले पनि विभागको निर्णयप्रति आपत्ति जनाए ।
बेलबारी उद्योग वाणिज्य महासंघका वाणिज्य उपाध्यक्ष केशव थापा मगरले व्यवसायीहरूको माग जायज रहेको बताए । ‘व्यवसायीहरूको चिन्ता बढेको छ । सरकारले निर्णय गर्दा सम्बन्धित पक्षसँग पर्याप्त छलफल गर्नुपर्दछ, उनले भने ।
कार्यक्रममा इलाका प्रहरी कार्यालय बेलबारीका प्रतिनिधि सही सोमबहादुर भण्डारीले भने औषधि सम्बन्धी नियमको पालना गर्नुपर्ने बताए । अन्तरक्रिया कार्यक्रममा बेलबारी, सुन्दरहरैचा नगरपालिका, केराबारी गाउँपालिका र ग्रामथान गाउँपालिकाका औषधि व्यवसायीहरूको उपस्थिति रहेको थियो । उपस्थित व्यवसायीहरूले आफ्नो जीविकोपार्जनमा प्रत्यक्ष असर पर्ने निर्णय तत्काल सच्याउन सरकारसँग माग गरेका छन् ।