विराटनगर । विदेश पठाइदिन्छु भन्दै ठगी गरेको आरोपमा प्रहरीले पाँच जनालाई पक्राउ गरेको छ । आकर्षक रोजगारी हुने भन्दै विभिन्न प्रलोभनमा पारी ठगी गरेको आरोपमा प्रहरीले पाँच जनलाई पक्राउ गरको हो । पक्राउ पर्नेहरुमा एक जना भारतीय रहेका छन् । जसमा भारत अररिया जिल्ला जोगवनी ग्राम पंचायत ३ बस्ने वर्ष २३ का केशव यादब, कटहरी गाँउपालिका ३ बस्ने बर्ष २२ का रोहित कुमार पासवान, बिराटनगर महानगरपालिका – ८ बस्ने वर्ष २३ का करण भन्ने अमीत राय, कटहरी ३ का बर्ष ३० का बुद्धनारायण मलाह र पथरी शनिश्चरे नगरपालिका ५ बस्ने बर्ष २५ का बोधराज राजँवशीलाई पक्राउ गरिएको मोरङ प्रहरीका प्रवक्ता डिएसपी वेद प्रकाश जोशीले जानकारी दिए । उनीहरुले युरोप, अमेरिका, कुवेत, दुवई पठाउने भनि भ्रममा पारी ठगी गरेको आरोप छ ।
उनीहरुले बिराटनगर महानगरपालिका वडा नं ११ बस्ने महेश कुमार चौधरीको छोरा युपेश कुमार चौधरीलाई क्यानाडा देश पठाई दिन्छु भनि ६६ लाख ६७ हजार रुपैयाँ ठगी गरेको डिएसपी जोशीले बताए । ‘बिभिन्न बिदेशी मोवाइल नम्बरहरुबाट खोलिएको वाटसपबाट महेश कुमार चौधरीलाई कल गरी भिषा प्रयोजनका लागि आवश्यक कागजातहरु समेत पठाई प्रलोभनमा पारी बिभिन्न मानिसहरुको बैंक खातामा पटकपटक गरी ६६ लाख ६७ हजार जम्मा गर्न लगाई ठगी गरेको पाइएको छ ,’ डिएसपी जोशीले भने, ‘ठगीमा परेपछि पीडितले दिएको जाहेरीको आधारमा उनीहरुलाई पक्राउ गरिएको हो ।’
पक्राउ परेका प्रतिवादीहरुलाई मोरङ अदालतमा मंगलबार ठगी सम्बन्धित कसुरमा पाँच दिनको म्याद थप गरि अनुसन्धान सुरु गरिएको छ ।