विराटनगर । गुरूङ समुदायले सोमबार तमु ल्होसार धुमधामका साथ मनाएका छन् । गुरुङ समुदायले गरुङ वर्गलाई बिदाइ गर्दै नाग वर्गलाई स्वागत गरी ल्होसार पर्व मनाउने गर्दछन् ।
तमु ह्युल छोंज धी गुरुङ राष्ट्रिय परिवार तमुस्यो महानगर इकाई कमिटि विराटनगरले मंगलबार एक कार्यक्रम आयोजना गरी तमु ल्होसार पर्व मनाएको हो । तमु समुदायले परिवार, आफन्त, साथीभाइ तथा इष्टमित्रबीच जमघट गरी मौलिक खानाका परिकार खाने र एकआपसमा शुभकामना आदानप्रदान गर्दै पुस १५ लाई ल्होसार (नयाँ वर्ष) का रूपमा मनाउँदै आएका छन्।

कार्यक्रममा बोल्दै विराटनगर महानगरपालिका प्रमुख नागेश कोइरालाले तमु ल्होसार चाडपर्वले राष्ट्रिय एकता र साझा नेपालीको पहिचान कायम गर्नमा अहम् भूमिका निर्वाह गर्ने विश्वास लिएको बताए । विविधतायुक्त नेपाली समाजमा यस्ता पर्वका कारण आपसी सद्भाव, सहिष्णुता र भ्रातृत्वको भावना अभिवृद्धि भई राष्ट्रिय एकतालाई थप सुदृढ बनाउन सहयोग पुग्ने उनले बताए । यस्ता पर्वले नेपालका सबै जातजातिबीच आपसी सद्भाव अभिवृद्धि गर्नाका साथै पारिवारिक, सामुदायिक र सामाजिक एकता कायम राख्न सहयोग गर्ने विश्वास लिएको उनले बताए ।
कार्यक्रममा कटहरी गाउँपालिका अध्यक्ष देवराज चौधरी, धनपालथान गाउँपालिका प्रमुख जिवछ प्रसाद गच्छदार, जहदा गाउँपालिका प्रमुख जितेन्द्र प्रसाद साहलगायतले बोलेका थिए ।
सोही अवसरमा दौडमा प्रथम, द्धितीय र तृतीय हुनेहरुलाई पुरस्कार पनि वितरण गरिएको छ । त्यसैगरी तमु ल्होसारमा सांस्कृति नृत्य पनि प्रस्तुत गरि थप रमाइलो भएको थियो ।