विराटनगर । नेपाल पत्रकार महासंघ कोशी प्रदेशको सचिवसहित दुई जना सदस्यहरु प्रेस सेन्टर र समाजवादी प्रेस संगठनका उम्मेदवार निर्विरोध निर्वाचित भएका छन् ।

महासंघ प्रदेश सचिवमा समाजवादी प्रेस संगठनका धुव्र भट्टराई र महिला सदस्यहरुमा प्रेस सेन्टरका अमृता विश्वकर्मा र बुद्धमाया सोङ्मी निर्विरोध निर्वाचित भएकी हुन् । त्यसैगरी प्रेस चौतारीकी उम्मेदवार बिनु चेम्जोङ्ग पनि सदस्यमा निर्विरोध निर्वाचित भएकी छिन् ।

मंसिर २८ गते हुने नेपाल पत्रकार महासंघको निर्वाचनमा सत्ता गठबन्धनको तर्फबाट नेपाली काँग्रेस निकटको प्रेस युनियन र एमाले निकटको प्रेस चौतरीले संयुक्त प्यानल बनाएर चुनावी मैदानमा उत्रिएका छन् भने माओवादी निकट प्रेस सेन्टर र एकीकृत समाजवादी निकटको समाजवादी प्रेस संगठनको गठबन्धन प्रदेशमा रहेको छ । सत्ता गठबन्धनबाट महासंघ प्रदेश सचिबमा बावुराम कार्कीलाई उठाएको थियो । कार्कीले मनोनय पत्रमा हस्ताक्षर नगरेपछि उनको उम्मेदवारी निर्वाचन कार्यालयले खारेजी गरेपछि सचिवमा भट्टराई मंगलबार निर्विरोध भएका हुन् । त्यसैगरी महिला सदस्यमा युनियनको जोस्ना श्रेष्ठ, प्रेस चौतारीको रञ्जना अधिकारी र मनोज दाहालको सदस्य खारेजी भएको छ । उनीहरुको सदस्य प्राप्त गरेको पाँच वर्षको समय अवधी पूरा नभएपछि निर्वाचन कार्यालयले उम्मेदवारी खारेजी गरेको हो । महासंघको विधानमा सदस्यता प्राप्त गरेको पाँच वर्ष पूरा भएकाले मात्रै प्रदेशको सदस्य बन्न पाउने व्यवस्था छ ।

शुक्रबार हुने निर्वाचनमा महासंघ कोशी प्रदेशमा अध्यक्षका लागि तीन जनाको उम्मेदवारी परेको छ । अध्यक्षमा भरत खड्का, विवेक गौतम र सन्तवीर लामाले उम्मेदवारी छ । खड्का सत्ता गठबन्धनको उम्मेदवार हुन् भने गौतम प्रेस सेन्टर, समाजवादी प्रेस संगठनलगायत पत्रकार निकट संघको साझा उम्मेदवार हुन् । लामा नेपाल आदीवासी जनजाती पत्रकार महासंघ (फोनिज) १ को तर्फबाट उम्मेदवार भएका हुन् ।
महासंघ प्रदेशमा ७ जनाको पदाधिकारीमा १८ जनाको उम्मेवारी परेको छ । त्यसैगरी १४ जना सदस्य पदको लागि २६ जनाको उम्मेदवारी रहेको छ ।