विराटनगर । लागूपदार्थ सेवन (लापसे) सेवन गरेर सवारीसाधन सञ्चालन गर्ने चालकसमेत फेला पर्न थालेका छन् । यसरी लापसे गरेर सवारी चलाउने चालक फेला परेसँगै यातायातमा गम्भीर लापरवाही बढ्दै गएको पुष्टि भएको छ । पछिल्लो समयमा लापसे गरेर पनि गाडी चलाउने चालक फेला परिरहेका छन् ।

सीमावर्ती बजार भारतको जोगवनीमा गएर लागूऔषध सेवन गर्ने र सवारी चलाएको फेला परेपछि त्यसविरुद्ध जिल्ला ट्राफिक प्रहरी कार्यालय मोरङले आक्रमक रूपमा प्रस्तुत हुन थालेको छ । त्यसैले अहिले लापसे जाँच अभियानलाई तीव्रता दिइएको मोरङ ट्राफिक प्रहरी प्रमुख प्रहरी निरीक्षक राजन लम्सालले जानकारी दिए ।
सोही अभियानका क्रममा शनिबार विराटनगर १६ रानी क्षेत्रमा मोरङ ट्राफिक, इलाका प्रहरी कार्यालय रानी र लागुऔषध नियन्त्रण ब्युरोले संयुक्त जाँच अभियान सञ्चालन गरेको थियो । सो अभियानको क्रममा लापसे गरेर सवारी चलाउने १० जनालाई नियन्त्रणमा लिएको मोरङ ट्राफिक प्रमुख प्रहरी निरीक्षक लम्सालले बताए । १५ जनाको परीक्षण गरेको मध्ये १० जनाले लागुपदार्थ सेवन गरेको उनले बताए । लागूऔषध सेवन गरेर सवारी चलाउने पाँच जना सिटी र अन्य सार्वजानिक यातयत चलाउने गरेको उनले बताए ।
यसअघि पनि मोरङ ट्राफिकले लापसे गरेर सवारी साधन चलाउने ८ जनालाई नियन्त्रणमा लिएको थियो ।

सार्वजानिक सवारीसाधनका कर्मचारी (चालक, सहचालक, परिचालक) लाई लक्षित गरेर मोरङ ट्राफिक प्रहरीले लापसे सम्बन्धी चेकजाँच अभियान तिव्र रुपमा अगाडी बढाएको छ । यसरी परीक्षणको क्रममा लापेश गरेर सवारी साधन चलाएको पत्ता लगेपछि कारवाहीको दायरामा ल्याउने उनले बताए । लापसे सेवन गरेर सवारी चलाउने १० जनालाई ईलाका प्रहरी कार्यालय रानीमा पठाईएको छ । यस अघि रानी नाकामा मोरङ प्रहरीले लागुपदार्थ सेवन नियन्त्रण अभियान सञ्चालन गर्दै आएको छ ।

ट्राफिक प्रहरीले लामो समयदेखि मापसे चेकजाँचलाई निरन्तरता दिँदै आएको छ । ब्रेथलाइजर मेसिनको प्रयोगबाट गरिने चेकजाँचले सवारी चालकले मापसे गरे÷नगरेको पत्ता लाग्छ ।
ट्राफिक प्रमुख लम्सालले मापसे चेकजाँच प्रभावकारी देखिएको र मादक पदार्थ सेवन गर्ने सवारी चालक निरुत्साहित हुँदै गएको बताए । तर मापसे छाडेर सवारीका चालक तथा सहचालक लापसेतिर लागेको सूचना आएपछि चेकजाँच अभियान सुरु गरिएको उनको भनाइ छ ।
‘चालकले लागूऔषध सेवन गरेर सवारी चलाउने गरेको सूचना र गुनासा आइरहेका छन्,’ उनले भने, ‘पछिल्लो समय दुर्घटना वृद्धि हुँदै जानुका कारण एउटा यो पनि हुनसक्छ ।’ उनका अनुसार लागूऔषधको सेवनका कारण दुर्घटना बढ्नुका साथै समाजमा विभिन्न प्रकृतिका अपराध पनि बढेको पाइन्छ ।

कसरी हुन्छ लापसे चेक ?
सवारी चालकको पिसाव चेकजाँच गरेर लागुपदार्थ खाए–नखाएको पत्ता लगाउने गरिन्छ । ‘लापसे चेक गर्ने एक प्रकारको किट हुन्छ । यो किटको माध्यमबाट तत्कालै लापसेको रिजल्ट थाहा हुन्छ । उक्त किटले कुन लागुपदार्थ भन्ने छुट्टिँदैन । तर, गाजा, चरेसलगायतका सवै पकारका लागुपदार्थ डिटेक्ट गर्छ । पिसाव चेकजाँचका क्रममा पोजेटिभ रिजल्ट आएका सवारी चालकलाई नियन्त्रणमा लिएर अनुसन्धान गरिन्छ ,’ ट्राफिक प्रहरी निरीक्षक लम्सालले भने ।
लागुपदार्थ सेवनले सेवनकर्ताको शारीरिक तथा मानसिक स्थितिमा परिवर्तन ल्याउँछ । यसको सेवन गरेर सवारीसाधन चलाउँदा सवारी दुर्घटनाकोसमेत जोखिम हुने भएकाले नशालु पदार्थ सेवन गरी सवारीसाधन नचलाउन मोरङ ट्राफिकले अभियान नै सुरु गरेको छ ।
यातायात क्षेत्रलाई लागूऔषधमुक्त बनाएर सुधार गर्दै लागू पदार्थ सेवनलाई निरुत्साहित गराउने उदेश्य रहेको जानकारी उनले बताए । लापशे चेकजाँचलाई तीव्र पार्दै विस्तार गरेर लगिने उनको भनाइ छ ।