विराटनगर । विराटनगरस्थित कोशी अस्पताललाई एक करोड ६ लाख बढीको अत्याधुनिक नेत्ररोग चिकित्सा उपकरण सहयोगमा आएपछि आँखाको अल्ट्रासाउन्ड र जलबिन्दु भएका विरामीहरुको आँखाका नशा जाँचलगायतका सेवाहरु सुचारू भएको छ ।
तीन महिना अगाडीदेखि मोतियाबिन्दु लागेका विरामीको फेको प्रविधिबाट आँखाको शल्यक्रिया गर्दै कोशी अस्पतालमा अब आँखाको अल्ट्रासाउन्ड, पेसर नाप्ने, जलबिन्दुको नशा जाँच सुरु भएको हो ।
ओपीडि र ओटी कक्षहरुमा नेत्ररोग चिकित्सा उपकरण जापान सरकारको ग्रासरुट ह्युमन सेक्युरिटी प्रोजेक्ट (जीजीपी) को अनुदान सहयोग आएपछि कोशीबाट रेफर गरिनुपर्ने विरामीको संख्यामा कमी आउने कोशी अस्पतालको आँखा रोग विभागकी प्रमुख नेत्ररोग विशेषज्ञ डा.आस्मा केसीले बताइन् । कोशी अस्पतालमा फेको प्रविधिबाट मोतियाबिन्दुको शल्यक्रिया भएपनि आँखाको अल्ट्रासाउन्ड र जलबिन्दु भएका विरामीहरुको आँखाका नशा जाँच हुने गरेको थिएन ।
जीजीपिले अस्पताललाई ओपीडिमा प्रयोग हुने आँखाको प्रेसर नाप्ने उपकरण, आँखाको अटामेटिक रुपमा चस्मा जाँच गर्ने, आँखाको भिडियो एक्सरे गर्ने उपकरणहरु आएको हो । ‘मोतिया बिन्दु भएका विरामीको आँखा भित्र लेन्स हाल्ने गरिन्छ । आँखामा नाप लिन भिडियो एक्सरे गरिन्छ । आँखामा चोट भएको पनि हेर्न अल्ट्रासाउन्ड गरेर थाहा पाइन्छ । जलबिन्दु लागेका विरामीको आँखा जाँच पनि गरिन्छ । जसलाई मेडिकल भाषमा ‘पेरिम्याट्रि’ भन्ने गरिन्छ । पेरिम्याट्रिले जलबिन्धु भएको छ भने जाँच गर्न मिल्छ । आँखाको दृष्टी जाँच गर्ने उपकरणहरु आएको हो,’ डा. केसीले भनिन्, ‘आँखाको आधुनिक उपकरणहरु आएपछि उपचारमा सहज भएको छ ।’

कोशी अस्पताललाई जापान सरकारले शुक्रबार अत्याधुनिक नेत्ररोग चिकित्सा उपकरण हस्तान्तरण गरेको हो । नेपालस्थित जापानी राजदूतावासका डेपुटी चिफ अफ मिसन तामुरा ताकाहिरोको उपस्थितिमा सामान हस्तान्तरण गरिएको छ । कार्यक्रममा बोल्दै टमुराले परियोजनामा संलग्न सबैको प्रयासको लागि बधाई तथा प्रशंसा व्यक्त गरे । उनले यस परियोजनाले दृष्टिविहीन बिरामीको दैनिक जीवनमा आउने बाधा तथा मनोवैज्ञानिक चिन्ता तथा परिवारमा पर्ने आर्थिक बोझ कम गर्न सहयोग पुग्ने बताए । उनले अत्याधुनिक चिकित्सा उपकरण प्रयोग गरी आँखा रोगको समस्या समाधान गर्न अस्पतालले आफ्नो क्षमतामा उल्लेख्य सुधार गर्ने विश्वास पनि व्यक्त गरे । स्वास्थ्य उपकरण बुझदै कोशी अस्पतालका मेसु डा. रविराज सिंहले नेत्ररोग उपचारको लागि स्वास्थ्य उपकरणले विरामीको स्वास्थ्य जाँचमा ठूलो सहयोग पुग्ने बताए ।

कोशी अस्पतालमा मोतिया बिन्दुको फेको प्रविधिबाट शल्यक्रिया हुने गरेको छ । त्यसैगरी हातबाट गरिने शल्यक्रिया, आँखामा मासु पलाएको पनि शल्यक्रिया हुने गरेको छ ।
कोशीमा आँखा विभागमा ४० जनासम्म विरामी ओपीडिमा आउने गरेका छन् । हप्ताको तीन दिन सोमबार, मंगलबार र बिहीबार आँखाको अप्रेसन हुने गरेको छ । दैनिक ३ देखि ४ वटा अप्रेसन हुने गरेको छ । आँखा विभागमा डा. केसीसहित, नेत्ररोग विशेषज्ञ डा. निश्चल घिमिरे, डा. प्रविण कुमार यादब, सुष्मा सुब्बा, डा. प्राचि दुलाल र संजिवनी केसी रहेका छन् ।