विराटनगर । उपचार नपाएर पाँच दिनदेखि धरानको जङ्गलमा छटपटिएका कैलालीको टिकापुर ६ का ४० वर्षीय कैलाश चौधरीको सफल उपचार भएको छ । चौधरीको विराटनगरस्थित आर्या न्युरो हस्पिटलमा सफल उपचार भएको हो ।

लेभर काम गर्ने चौधरी कामको सिलसिलामा भदौको पहिलो साता तेह्रथुम जाने भनेर घरबाट हिँडेका थिए । उनी भदौ १२ गते सार्वजनिक सवारी साधन चढेर धरानबाट उकालो लागे । भेडे टारदेखि मुनिको जङ्गलमा शौच लागेपछि गाडी रोकेको थियो । शौच गर्न गएका चौधरीलाई रिगाटा चलेपछि जङ्गलको भिरबाट खोल्सीमा झरे । भिरबाट झरेपछि उनी बेहोस भए । दुई दिनसम्म होस आएन । भिरबाट लडेको पाँचौँ दिन जङ्गल घाँस काट्न गएका स्थानीयले उनी लडेको देखेपछि उद्धार गरेर धरानस्थित बिपी कोइराला विज्ञान प्रतिष्ठानमा ल्याए । उक्त हस्पिटलमा उपचार सम्भव नहुने भएपछि थप उपचारको लागि विराटनगर लैजान सुझाव दिए । त्यसपछि चौधरीलाई विराटनगर ३ कन्चनबारीस्थित आर्या न्युरो हस्पिटलमा लिएर आए । आर्यामा ल्याउँदा ठाउँमा चोट लागेर किरा परेको थियो ।

‘घाउमा किरा पलाएको थियो । मेडिकल भाषामा ‘म्यागोस’ पलाएको थियो । यो किरा कुहिएको चिजमा लाग्ने किरो हो,’ उपचारमा संलग्न वरिष्ठ न्युरो सर्जन डाक्टर पंकजराज नेपालले भने, ‘ यहाँ ल्याएपछि तीन दिन लगाए घाउ सफा गरियो । घाउमा किरा थियो । मस्तिष्कमा किराको फुलहरू थियो । हामीले प्लास्टिक सर्जरी गरेर कैलाशलाई बचाउन सफल भयौँ । ’ छारे रोगले एटायक गर्दा पनि यस्तो हुने उनले बताए । ‘एक्कासि रिगाटा लागेर ढलेको हुनाले छारे रोगले एट याक गरेको हुनसक्छ,’ डाक्टर नेपालले भने, ‘हस्पिटलमा बैलेमा ल्याएकोले हामीले उपचार गरेर बचाउन सक्यौँ ।’ लामो समयसम्म उपचार गरेपछि चौधरी ठिक भएकाले डिस्चार्ज गरिएको उनले बताए । ‘डिस्चार्ज गर्दा घाउ एकदमै राम्रो भाको छ,’ उनले भने, ‘रिकभर राम्रो भएपछि अहिले कैलाशलाई घर पढाएको छ । ’

कैलाशकी श्रीमती सविताले श्रीमानले आर्या न्युरो हस्पिटलमा नयाँ जीवन पाएको बताइन् । ‘पाँच दिनदेखि जङ्गलमा पानी मात्र खाएर बसेका श्रीमानलाई जङ्गल गएका कृषकले उद्धार गरेर हस्पिटल ल्याउनुभएको रहेछ । यहाँ ल्याएपछि श्रीमानले राम्रो उपचार पाउनुभयो । अहिले निक्कै ठिक हुनुभएको छ । उपचार गरेर श्रीमानलाई पुनः जन्म दिने हस्पिटल र चिकित्सकप्रति आभारी छु,’ उनले भनिन् ।