विराटनगर । कोशी प्रदेशका प्रदेश प्रमुख पर्शुराम खापुङले दसैँ, तिहार, नेपाल संवत्, छठलगायत चाडपर्वलाई सांस्कृतिक एकता र सामाजिक सदभाव कायम अभिवृद्धिको पर्वका रूपमा मनाइनुपर्नेमा जोड दिएका छन् ।

मोरङ व्यापार संघले बिहीबार बडादसैँ, शुभदीपावली, नेपाल संवत् छठलगायत चाडपर्वको अवसरमा आयोजना गरेको शुभकामना आदानप्रदान कार्यक्रममा प्रदेश प्रमुख खापुङले यस्तो बताएका हुन् ।

उनले नेपालमा मनाइने सबै चाडपर्वको समान सांस्कृतिक महत्व रहेकाले कुनै पनि चाडपर्वलाई भेदभाव गर्न नहुने उल्लेख गरे । पारिवारिक मिलन र आपसी भाइचारा अभिवृद्धिमा पनि चाडपर्वले भूमिका खेल्ने उनले बताए । दसैँलगायतका चाडपर्वले नेपालीलाई एकता, सामाजिक सदभाव र आपसी भाइचारा अभिवृद्धिमा टेवा पुग्ने उनले विश्वास व्यक्त गरे । कार्यक्रममा पुर्व संघीय मामिला तथा स्थानीय प्रशासन मन्त्री अमनलाल मोदीले दसैँलगायतका सांस्कृतिक पर्वहरूले आपसी विश्वास, मित्रता र भाइचारा कायम गर्न सहयोग पुग्ने बताए ।

कार्यक्रममा मोरङ व्यापार संघका अध्यक्ष तथा नेपाल उद्योग वाणिज्य महासंघका केन्द्रीय सदस्य नविन रिजालले दसैँलगायत चाडपर्वका अवसरमा आपसी सद्भाव, एकता र सुखशान्ति एवम् सुस्वास्थ्य र दीर्घायुको कामनासहित शुभकामना आदानप्रदान गरे । संघका महासचिव अनिल सारडाले संचालन गरेको उक्त कार्यक्रममा मन्त्री, प्रतिनिधि सभाका सांसद्, प्रदेश सभाका सदस्यलगायतका विभिन्न संघ–संस्थाका प्रतिनिधीहरुको उपस्थिती रहेको थियो ।