विराटनगर । विराटनगर ७ हस्पिटल चोकमा दर्ता बेगरको एउटा प्रयोगशाला शिलबन्दी गरिएको छ । दर्ता बेगर संचालनमा आएको मेडिकुईस्ट प्रयोगशाला विराटनगर महानगरपालिकाले शिलबन्दी गरेको हो ।

महानगरपालिका र प्रदेश जनस्वास्थ्य प्रयोगशालाले बिहीबार गरेको अनुगमनको क्रममा दर्ता बेगर संचालन रहेको पाइएपछि मेडिकुईस्ट ल्याब शिलबन्दी गरिएको विराटनगर महानगरपालिका स्वास्थ्य महाशाखा प्रमुख हैदर अलीले जानकारी दिए ।

‘महानगरपालिकामा दर्ता बेगर प्रयोगशाला संचालनमा रहेको उजुरी परेको थियो । उजुरीको आधारमा अनुगमन गरेका थियौं । एउटा घरको कोठा भाडामा लिएर ल्याब बिना दर्ता संचालन गरेको पाइयो,’ उनले भने, ‘दर्ता बेगर मनलाग्दी रुपमा विरामीको स्याम्पल झिकेर विभिन्न जाँच गरेको पाइयो ।’ दर्ता बेगर संचालनमा आएको प्रयोगशालाले संकलन गरेको स्याम्पलहरु भारतको जोगवनी पढाउने गरेको पाइएको छ । ‘झापा, मोरङ र धनुषाबाट संकलन गरेको स्याम्पल विराटनगरमा ल्याएर भारत पढाउने गरेको पाएको छ,’ उनले भने । यसरी विभिन्न जिल्लाबाट संकलन गरेको स्याम्पलहरु भारत पढाउँदा यहाँभन्दा सस्तो बढी मुनाफा हुने भएकोले दर्ता बेगारको ल्याबमा उत्ता पढाउने गरेको बुझिएको छ ।

दर्ता बेगरको प्रयोगशाला सुनिल मण्डल र पकज साहको रहेको छ । ‘अहिले प्रयोगशाला शिलबन्दी गरि अनुसन्धान सुरू हुने स्वास्थ्य महाशाखा प्रमुख अलीले भने, ‘थप अनुसन्धानपछि कसुरको अवस्था हेरेर थप कारवाही हुनेछ ।’
प्रयोगशाला संचालनको लागि विराटनगर महानगरपालिका र प्रदेश जनस्वास्थ्य प्रयोगशालाबाट अनुमति लिनुपर्ने व्यवस्था रहेको छ । तर, विराटनगरको कोशी हस्पिटल अगाडी र हस्पिटल चोकतिर च्याउसरी खुलेको क्लिनीक र प्रयोगशालाहरु नाम मात्रको रहेका छन् । यहाँ रहेका धेरै प्रयोगशालाहरु दर्ता बेगरको रहेको यस क्षेत्रका जानकारहरु बताउँछन् ।