विराटनगर । संघीय मामिला तथा सामान्य प्रशासन मन्त्री अमनलाल मोदीले थारु समुदायको पहिचान जोगाउन एकजुट भएर अघि बढ्नुपर्नेमा जोड दिएका छन् ।
मोरङको बेलबारी नगरपालिकाको डांगिहाटमा थारु कल्याणकारिणी सभाको १० औं जिल्ला अधिवेशनको शुक्रबार उद्घाटन गर्दै मोदीले यस्तो बताएका हुन् ।
मन्त्री मोदीले एकजुट भएर अघि बढेमात्र सामुदायिक पहिचान स्थापित हुने भएकाले थारु सामुदायहरु फुटेर होईन जुटेर अघि बढ्नुपर्ने सुझाव दिए । उनले थारु समुदायले विगत देखीनै आफ्नो पहिचान स्थापित गर्न विभिन्न संघर्षहरु गर्दै आएको बताए । थारुहरुको पहिचान गुम्नबाट जोगाउन सामुदायिक संस्थाको रुपमा थारु कल्याणकारिणी सभाले बिशेष भुमिका निर्वाह गर्नुपर्ने उनले बताए । समुदायको सर्वपक्षिय विकासका निम्ति सामाजिक चेतनाको अभियान समेत चलाउनुपर्नेमा मन्त्री मोदीले जोड दिए । मन्त्री मोदीले थारुहरु भुमिपुत्र रहेको उल्लेखगर्दै विगतमा मलेरियासंग लड्दै आएकाले थारु समुदायका अधिकांश ब्यक्तिहरुको जिनमा सिकल सिलेनिमियाको गम्भिर समस्या देखिएको उनको भनाई थियो ।
मन्त्री मोदीले थारु समुदायको उन्न्यनका निम्ति आफु मातहतको मन्त्रालयबाट हुनसक्ने सम्मको सहयोग गर्न प्रतिबद्ध रहेको समेत बताए ।

कार्यक्रममा बोल्दै संबिधान सभा सदस्य दिलीपकुमार गच्छदार,प्रेदश सभा सदस्यद्वय चुमनलाल तवदार,जयप्रकाश चौधरी र आयोजक संस्थाका केन्द्रीय उपाध्यक्ष कनुलाल चौधरी,नेपाली काँग्रेसका मोरङ उपाध्यक्ष भक्तीनाथ माझी लगायतका वक्ताले थारु समुदायको योगदान र अवस्थाका बिषयमा बालेका थिए । उनीहरुले कल्याणकारिणी सभाले आफ्ना गतिविधिलाई थप प्रभावकारी रुपमा अघि बढाउनुपर्ने जोड दिए । सभाको १० औं जिल्ला अधिवेशनले नयाँ कार्यसमिति समेत चयनगर्ने सभाका मोरङ अध्यक्ष प्रदिप भगतले जानकारी दिए ।