विराटनगर । नेपाल औषधी व्यवसायी संघको ५० औं स्थापना दिवसको अवसर पारेर जिल्ला ट्राफिक प्रहरी कार्यालय मोरङलाई स्वास्थ्य सामाग्री वितरण गरिएको छ ।

संघको स्थापना दिवसको अवसर पारेर सप्ताहव्यापी कार्यक्रम अन्र्तगत नेपाल औषधी व्यवसायी संघ मोरङ शाखाले बिहीबार लागुऔषध पदार्थ सेवन (लापसे) गरे नगरेको परीक्षण गर्ने किटसहित स्वास्थ्य सामाग्री ट्राफिक प्रहरीलाई वितरण गरेको हो ।

संघका अध्यक्ष लक्ष्मी तिम्सिना, उपाध्यक्ष देशबन्धु ढकालले किट र स्वास्थ्य सामाग्री मोरङ ट्राफिक प्रहरी प्रमुख ट्राफिक प्रहरी निरीक्षक सुनिल श्रेष्ठलाई हस्तान्तरण गरेका थिए । लापसे किट नभएको कारणले ट्राफिक प्रहरीलाई परीक्षणमा समस्या भएको थियो । लापसे गरेर सवारी चलाएको ब्रेथलाइजर मेसिनले पत्ता लाग्दैन । मादक पदार्थ सेवन (मापसे) गरेको मात्र ब्रेथलाइजर मेसिनले पत्ता लगाउने गर्दछ ।

लापसेको पत्ता नलाग्दा ट्राफिक प्रहरीलाई समस्या हुने गरेको थियो । अब लापसे सेवन गरे नगरेको परीक्षण गर्ने किट आएकोले ट्राफिक प्रहरीले लापसे अभियान सुरू गर्ने मोरङ ट्राफिक प्रहरी प्रमुख प्रहरी निरीक्षक सुनिल श्रेष्ठले जानकारी दिए । लापसे सेवन गरेर सवारी चलाएको पाइए कारवाहीको दायरामा ल्याउन किटले सहयोग पु¥याउने उनले बताए । केही दिन भित्रमा लापसे अभियान पनि सुरु हुने ट्राफिक प्रहरी निरीक्षक श्रेष्ठले जानकारी दिए ।

संघको सप्ताहव्यापी कार्यक्रम बुधबारबाट सुरू भएको हो । पहिलो दिन विराटनगरस्थित कोशी अस्पतालमा भर्ना भएका विरामीहरुलाई फलफूल वितरण गरेको थियो । शुक्रबार विराटनगरको हस्पिटल चोकमा रक्तदान कार्यक्रममा रहेको संघका उपाध्यक्ष देशबन्धु ढकालले जानकारी दिए ।
संघले असार ५ गतदेखि १० गतेसम्म हप्ताभरी विभिन्न कार्यक्रम आयोजना गरी स्थापना दिवस मनाउने भएको छ । संघको स्थापना दिवस असार १० गते पर्दछ ।