विराटनगर । निमार्ण पुरा भएको एक वर्षपछि केही स्थानीयको अवरोधको बिच मोरङ कटहरी गाउँपालिका ४ नं. वडा कार्यालय नयाँ भवनमा सरेको छ ।

साबिकको ठाउँदेखि करिब सात समय मिटर उत्तरमा आफ्नै सुविधा सम्पन्न भवनमा वडा कार्यालय केही स्थानीयको विरोधको बिच बुधबार वडा कार्यालय सरेको हो ।

सुविधा सम्पन्न नयाँ भवन बनेको भए पनि वर्षौँदेखि जीर्ण भवनमा मासिक २० हजार रुपैयाँ भाडा तिरेर वडा कार्यालय बस्दै आएको थियो । कटहरी ४ जुडी र नयाँ बजारका केही स्थानीयको अवरोध र वडाध्यक्ष जिवनेश्वोर यादवको असहयोगको कारणले वडा कार्यालय सार्न सकेको थिएन । विरोधको भए पनि गाउँपालिकाले वडा कार्यालय आफ्नै भवनमा सारेर सेवा सुचारु गरेको छ ।

कटहरी गाउँपालिका अध्यक्ष देवराज चौधरीले वडा कार्यालय सार्न ९ बजे वडा कार्यालय गाडी पढाएका थिए । तर, यहाँका स्थानीयले वडा कार्यालयबाट कागजपत्र झिक्न नदिन वडा कार्यालय अगाडी अवरुद्ध गरे । प्रहरी प्रशासनबाट असहयोग भएको कारणले वडा कार्यालयको भवन सार्न बुधवार समयमै नसकिएको गाउँपालिका अध्यक्ष देवराज चौधरीले बताए ।

‘वडा कार्यालयको आफ्नै भवन बनिसकेको छ । हामीले आफनै भवनमा वडा कार्यालय लैजान कार्यपालिकाबाट निर्याण पनि गरिसकेका छौँ,’ उनले भने, ‘कार्यालय सार्न खोज्दा केहीले अवरोध गरेका छन् । तर, प्रहरी प्रशासनबाट साथ सहयोग नभएको कारणले समयमै सार्न कठिनाइ भयो ।’ प्रहरी प्रशासनबाट पूर्ण रूपमा सहयोग नभएको कारणले वडा कार्यालयको कागजपत्र पुरानै भवनबाट झिक्न नसिकिएको उनले बताए । बुधवार झासदेखि नयाँ भवनबाट वडाको काम कारबाही सुरु भएको उनले बताए । ‘अब पुरानो भवनमा वडा कार्यालयका कर्मचारीहरू जाने छैनन्,’ अध्यक्ष चौधरीले भने, ‘सुरक्षा दिएर भए पनि नयाँ भवनबाट काम कारबाही हुनेछ । शान्ति सुरक्षाको व्यवस्था प्रशासनले गर्नुपर्दछ ।’

चार कोठाको पक्की एक तले भवन ८८ लाख ४५ हजार ४२७ रुपैयाँमा एक वर्ष अगाडी कटहरी ४ चमडाइ चौकदेखि तीन सय मिटर उत्तरमा बनेका छ । वडा कार्यालयको भवन २०७७ जेठ ११ गते सम्झौता भएर २०७७ चैत २० गते सम्पन्न भएको थियो ।
एक वर्ष अगाडी भवन निमार्ण भइसक्दा पनि विवादको कारणले नयाँ भवनमा वडा कार्यालय नसरी मासिक २० हजार रुपैयाँ तिर्दै जीर्ण भवनमा बस्दै आएको छ । वडा कार्यालय सार्न कटहरी गाउँपालिका ४ का वडाध्यक्ष जिवनेश्वोर यादव नमानेपछि गाउँपालिका अध्यक्ष चौधरीले चार महिनादेखि वडा कार्यालयको भाडा रोकिदिएका छन् । गत पुस २६ गते कार्यपालिका बैठकबाट नयाँ भवनमा वडा कार्यालय सार्ने निर्याण भएको थियो ।