विराटनगर । विराटनगरमा माघ १९ गतेदेखि सुरू हुने सीएनआई कोसी एक्स्पो २०७९ मा संसारकै अग्लो हिमाल सगरमाथादेखि नेपालकै सवैभन्दा होचो स्थान केचना कवल हेर्न पाइने भएको छ ।

नेपाल उद्योग परिसंघ (सीएनआई) प्रदेश १ को आयोजनामा सुरू हुन लागेको एक्स्पोमा प्रदेश १ को भौगोलिक, जातीय र साँस्कृतिक विविधतालाई एक्स्पोका माध्यमबाट अवलोकनकर्ताहरुलाई जानकारी दिने उदेश्यले यस्तो देखाउन लागिएको हो । त्यसका लागि एक्स्पो स्थलमा संरचना निर्माणको काम सुरु भएको छ ।

हिमालदेखि पहाड हुँदै तराईको भू–बनोटलाई एक्स्पोका दर्शकहरुले हेर्ने र त्यसबाट नेपालको भौगोलिकदेखि साँस्कृतिक सम्पन्नताबारे ज्ञान प्राप्त गर्ने अपेक्षा गरिएको सीएनआई प्रदेश १ का अध्यक्ष भीम घिमिरेले बताए ।
एक्स्पो विराटनगर–२ शंकरपुरमा लाग्दैछ । अहिले तयारी तिब्र भइरहेको छ । एक्स्पो स्थलमा आवश्यक संरचना जडान र निर्माणको काम जारी रहेको छ ।
ऐतिहाँसिक रुपमा आयोजना हुन लागेको एक्स्पोमा अवलोकनकर्ताहरुको मनोरञ्जनका लागि कोसी नदीमाथिको सेल्फी पुल, थारु र झाँगडको परम्परागत घरहरु जस्ता संरचना पनि निर्माण गर्न सुरु गरिएको छ ।
एक्स्पोमा नेपालकै चर्चित ब्याण्डहरुले प्रस्तुति दिने भएको एक्स्पो आयोजक समितिका संयोजक राजेन्द्र राठीले बताए ।