विराटनगर । मोरङको कानेपोखरी गाउँपालिका ६ मुलगाउँमा रहेको सरस्वती आधरभूत विद्यालयमा स्थापना गरिएको अक्षयकोषमा रकम बढाएर लगिएको छ । स्थापना गरिएको अक्षयकोषमा दाताहरूले रकम थप गरेर बढाएका हुन् ।

स्कुलमा चार वटा अक्षय कोष रहेको छ । सरस्वती पूजाको अवसर पारेर बिहीबार दाताहरूले अक्षयकोषमा रकम थपेर कोष बढाएको विद्यालय व्यवस्थापन समितिका अध्यक्ष खगेन्द्र बराइलीले जानकारी दिए ।
विद्यालयका पूर्व विद्यार्थी सुरेन्द्र दियालीले स्वर्गीय भएका वावुको नाममा स्थापना गरिएको कोषमा ६१ हजार १ सय ११ रुपैयाँ थप गरिदिएका छन् । स्वर्गीय हर्क बहादुर दियाली अक्षयकोष सुरुमा ५० हजार रुपैयाँको थियो । अहिले थप गरेर यो कोष १ लाख ११ हजार १ सय ११ रुपैयाँ बनाएको छ ।

यसअघि कालुसिंह, आइतरानी, बुधराज, धनबहादुर सावा अक्षयकोष १ लाख १ हजार, चन्द्र जोगमाया, संगीता पुरी अक्षयकोष ५१ हजार १ सय ५ रुपैयाँ र स्वर्गीय पदम बहादुर साम्बा लिम्बु अक्षयकोष ५० हजार रुपैयाँको रहेको छ । विद्यालयमा स्थापना भएको चार वटा अक्षयकोषको रकम ३ लाख १३ हजार २१६ रुपैयाँ भएको छ ।

बिहीबार ढाका बहादुर पुरीले स्वर्गीय छोरी संगीता पुरीको सम्झनामा १ हजार १ सयको विपन्न जेहन्दार विद्यार्थीलाई नगदसहित सम्मान गरिएको थियो । स्कुलमा स्थापना गरिएको अक्षयकोषबाट जेहन्दार विद्यार्थीहरुलाई पुरस्कार वितरण गरिदै आएको छ ।
सरस्वती पूजाको अवसर पारेर स्कुलको उत्कृष्ट शिक्षक लक्ष्मी मोक्तानलाई सम्मान गरियो । अतिरिक्त क्रियाकलापहरुमा उत्कृष्ट हुने विद्यार्थीहरुलाई पनि सम्मान गरिएको थियो ।