विराटनगर । विराटनगरबाट सञ्चालित नेपाल टाइम्स मिडिया प्रालिका सञ्चालक अब्दुल खत्ताबविरुद्ध मुद्दा दायर भएको छ । विराटनगरका उद्योगपति अरूणकुमार राठीलाई अपहरण गरी कुटपिट गरेको आरोपमा सोमबार खत्ताबविरुद्ध अपहरण तथा शरीर बन्धक र कुटपिट तथा अंगभंगको मुद्दा दर्ता भएको हो।

जिल्ला सरकारी वकिलको कार्यालय मोरङले अधिकतम् २५ वर्ष कैद र दुई लाख १० हजार माग गर्दै मुद्दा दायर गरेको हो।

अपहरण र शरीर बन्धक आरोपमा १० देखि १५ वर्ष कैद र १ लाख १० हजार जरिवाना र कुटपिट तथा अंगभंग १० वर्ष कैद र एक लाख रुपैयाँ जरिवाना माग गरिएको जिल्ला न्यायाधीवक्ता रामहरि काफ्लेले जानकारी दिए ।

सोमबार मुद्दा दर्ता भएकोले मंगलबारदेखि थुनछेक बहस सुरु हुनेछ । झन्डै एक महिना लामो अनुसन्धानपछि जिल्ला प्रहरी कार्यालय मोरङले खत्ताबविरुद्धको प्रतिवेदन शुक्रबार जिल्ला सरकारी वकिलको कार्यालयमा पेस गरेको थियो ।

मोरङ प्रहरीले सञ्चालक खत्ताबलाई विराटनगर १ बाट मंसिर २९ गते पक्राउ गरेको थियो ।

राठीको अपहरण आरोप लागेपछि र जाहेरी प्रहरीमा पुगेपछि खत्ताब दुई साता फरार भएका थिए। खत्ताबसहित अर्का एक जनालाई प्रहरीले पक्राउ गरिसकेको छ। अर्का एक जना भने फरार छन्।

खत्ताबले अन्तर्वार्ताको बहाना बनाएर राठीलाई मंसिर १४ गते नेपाल टाइम्सको स्टुडिओमा लगेर शरीर बन्धक बनाई १५ लाख रुपैयाँ असुलेको आरोप छ।

आफूलाई अपहरण गरी शरीर बन्धक बनाएको भन्दै विराटनगर ७ का ५६ वर्षीय राठीले प्रहरीमा जाहेरी दिएका थिए।

३१ वर्षीय खत्ताब विराटनगर ६ मा बस्दै आएका छन्। उनको घर सिरहा नगरपालिका ४ हो।

विगत तीन वर्षदेखि राठीलाई खत्ताबले मिडियामा पार्टनर बनाएका थिए। उक्त मिडियामा राठीको २० प्रतिशत अर्थात् ५ हजार कित्ता सेयर छ।

अपहरणबाट मुक्त गर्दा खत्ताबले उजुरबाजुर गरे ज्यान मारिदिने धम्की दिएका थिए। स्टुडियोमा लगेर खत्ताबले राठीलाई तारले बाँधेर ‘क्यामराको ब्यागमा पेस्तोल रहेको र जिन्दगी एउटा गोली न हो’ भनी धम्की दिएर चेक कटाएका थिए।