विराटनगर । प्रदेश १ को मुख्यमन्त्रीमा हिक्मत कार्की नियुक्त भएका छन् । प्रदेश प्रमुख पर्शुराम खापुङले संविधानको धारा १६८ को उपधारा (२) अनुसार संयुक्त सरकारको नेतृत्व गर्ने गरी कार्कीलाई आइतबार साझ मुख्यमन्त्री पदमा नियुक्त गरेका हुन् ।

शपथ सोमबार हुँदै छ । प्रदेशसभामा ९३ सांसद मध्ये एमालेका ४०, माओवादी केन्द्रका १३, राप्रपाका ६ र जसपाको १ गरी ६० सांसदको समर्थनमा कार्की मुख्यमन्त्री बनेका हुन् ।

एमाले संसदीय दलका नेता रहेका कार्कीलाई माओवादी संसदीय दलका नेता इन्द्रबहादुर आङ्बो, राप्रपाका दलका नेता भक्ति सिटौला र जसपाकी नेता निर्मला लिम्बूले मुख्यमन्त्रीमा नियुक्तीका लागि समर्थन दिएका छन् ।

उनको यो मुख्यमन्त्रीमा पहिलो सत्तारोहण हो । यसअघि कार्की प्रदेश १ को आन्तरिक मामिला तथा कानुन मन्त्री रहेका थिए ।