विराटनगर । नेपाली कांग्रेसका केन्द्रीय सदस्य अमृत अर्याल मोरङ क्षेत्र नंं. ५ (२) बाट प्रदेशसभा सदस्यमा विजयी भएका छन्। उनले प्रदेश १ का स्वास्थ्यमन्त्री तथा जसपाका नेता जयराम यादवलाई फराकिलो मत अन्तरले पराजित गर्दै प्रदेशसभा सदस्यमा विजयी भएका हुन्। आर्यालले मन्त्री यादवलाई ५ हजार २७८ मतले पराजित गरे ।

आर्यालले १६ हजार १०२ मत ल्याएका छन् । उनका निकटतम प्रतिद्वन्द्वी यादवले १० हजार ८ सय २४ मत ल्याए । तेस्रो भएका राप्रपका राजेश बानियाले ३ हजार २४७ मत ल्याए । मोरङ ५(२) मा ३४ हजार ८ सय ४ मत खसेको थियो । जसमा १ हजार ९ सय ९२ मत बदर भएको छ । निर्वाचन अधिकृत गणेश नायकले मत गणनाको अन्तिम परिणाम सार्वजनिक गर्ने तयारी भइरहेको बताएका छन्।

यसअघि मोरङ क्षेत्र नं. ५(१) मा काँग्रेसकै गयानन्द मण्डल निर्वाचित भइसकेका छन् ।

आर्याल २०३८ सालमा नेबिसंघ मोरङको सभापति भइसकेका छन् । २०६४ सालदेखि लगातार नेपाली काँग्रेसको मोरङको निर्वाचित जिल्ला सभापति भए काम गरेका छन् । नेपाली काँग्रेसको १३ औं महाधिवेशनबाट केन्द्रीय सदस्यमा मनोनित भए । उनी काँग्रेसको १४ औँ महाधिवेशनबाट निर्वाचित केन्द्रीय सदस्य रहेका छन् । उनले २०७२ सालको संविधानसभाको निर्वाचनमा तत्कालिन फोरमको अध्यक्ष उपेन्द्र यादवलाई पराजित गरेर संविधान सभाको सदस्य पनि भएका थिए ।