विराटनगर । मोरङको उर्लाबारीमा आफ्नै मामाको हत्या गरेको आरोपमा भान्जा पक्राउ परेका छन् । उर्लाबारी–८ का २२ वर्षीय सुजन पाँचकोटीले धारिलो हतियार बाम्फोक दाउले टाउँकोमा प्रहार गरेर मामा ४२ वर्षीय काजी महराको हत्या गरेको प्रहरीले जनाएको छ । मामाको हत्या गरेको आरोपमा प्रहरीले पाँचकोटीलाई पक्राउ गरेको मोरङ प्रहरीका प्रवक्ता डीएसपी दीपक श्रेष्ठले जानकारी दिए । महराको घर मोरङको पथरीशनिश्चरे नगरपालिका–१ हो ।

प्रहरीका अनुसार महरा ५ दिनदेखि उर्लाबारीस्थित बहिनी कल्पना पाँचकोटीको घरमा बस्दै आएका थिए । खाना खाएर सुतेका उनीमाथि भान्जा बहिनीका छोरा सुजनले राति ११ः४० बजेतिर बाम्फोकले प्रहार गरेको खुलेको डीएसपी श्रेष्ठले बताए ।

निद्रामा रहेका बेला बाम्फोक प्रहार हुँदा घाइते भएका महरालाई उपचारका लागि मदन भण्डारी अस्पताल तथा ट्रमा सेन्टर मंगलबारेमा लगिएको थियो । उपचारकै क्रममा सोमबार बिहानका राति १ बजेतिर उनको मृत्यु भएको प्रहरीले जनाएको छ ।

शव पोस्टमार्टमका लागि सोही अस्पतालमा राखिएको छ । मामाको हत्यामा संलग्न सुजनलाई इलाका प्रहरी कार्यालय उर्लाबारीका प्रहरी निरीक्षक मिलन थापा नेतृत्वको टोलीले हत्यामा प्रयोग गरिएको हतियारसहित पक्राउ गरेर घटनाको अनुसन्धान थालेको छ । हत्याको कारण खुलेको छैन ।

‘हत्या नै गर्नुपर्ने त्यस्तो कुनै कारण देखिँदैन,’ डीएसपी श्रेष्ठले भने, ‘उनीहरुबीचमा कुनै पुरानो रिसईबी रहेको वा कुनै विवाद भएको पनि पाइएन ।’ अनुसन्धानपछि घटनाको वास्तविकता पत्ता लाग्ने उनले बताए ।